मुख्यमंत्री ह दू हजार ले जादा मनखे मन ले करिन मुलाकात

बइगा आदिवासी मन के पट्टा के समस्या म मुख्यमंत्री ह कलेक्टर ल तुरते लगाइस फोन

डॉ. रमन सिंह ह सुनिन सबके बात
अंदाजन 97 लाख के निर्माण काम मन ल तुरते मिलीस मंजूरी

रायपुर, 09 नवम्बर 2017। मुख्यमंत्री डॉ. रमन सिंह ह आज इहां अपन निवास परिसर म आयोजित जनदर्शन कार्यक्रम म आम जनता ले मुलाकात करके मनखे मन के समस्या मन ल सुनिन। डॉ. सिंह ह कबीरधाम जिला ले आए बइगा आदिवासी मन के प्रतिनिधि मंडल के ज्ञापन ल तुरते संज्ञान म लीन अऊ उहां के कलेक्टर ल मोबाइल फोन म ए आदिवासी मन के पट्टा ले संबंधित समस्या के उचित निराकरण जल्दी सुनिश्चित करे के निर्देश दीन। मुख्यमंत्री ह आज के जनदर्शन म राजधानी रायपुर संग राज्य के कई ठन जिला मन के दू हजार ले जादा मनखे मन ले मुलाकात करिन। एमां ले 928 मनखे कई ठन प्रतिनिधि मंडल मन म सामिल रहिन, जबकि एक हजार 151 मनखे मन ह मुख्यमंत्री ल अपन-अपन व्यक्तिगत समस्या मन के बारे म आवेदन दीन।




मुख्यमंत्री ह पंच-सरपंच मन अऊ आन जनप्रतिनिधि मन के आग्रह म आज के जनदर्शन म 25 आवेदन मन म अंदाजन 97 लाख रूपिया के निर्माण काम मन के स्वीकृति तुरते प्रदान कर दीन, जमा सीसी रोड, सामुदायिक भवन अउ पुल-पुलिया मन के काम घलोक सामिल हे। डॉ. सिंह ह 62 मरीज मन ल संजीवनी कोष ले सहायता राशि के मंजूरी दीन अऊ 57 मरीज मन ल मेडिकल कॉलेज ले संबद्ध अम्बेडकर अस्पताल म निशुल्क इलाज बर भेजवाईन। डॉ. सिंह ह कबीरधाम जिला ले आए बइगा आदिवासी मन के प्रतिनिधि मंडल के ज्ञापन ल तुरते संज्ञान म लीन अऊ उहां के कलेक्टर ल मोबाइल फोन म ए आदिवासी मन के समस्या मन के उचित निराकरण जल्दी सुनिश्चित करे के निर्देश दीन। प्रतिनिधि मंडल ह मुख्यमंत्री ल ज्ञापन म बताइस कि कबीरधाम जिला के पंडरिया तहसील क्षेत्र के अंतर्गत ग्राम दमगढ़ म बइगा आदिवासी मन के अंदाजन 110 परिवार पाछू 80 बछर ले निवास करत हें अऊ खेती घलोक करत हें। ओ मन ल साल 1975 म शासन कोति ले जमीन के पट्टा दे गए रहिस, फेर साल 2014 म क्षेत्र के तत्कालीन राजस्व अधिकारी मन ह जांच करे बर उन सबके जमीन के पट्टा जमा करवा लीन अऊ आज तक उमन ल अपन जमीन के पट्टा वापस नइ मिलीस।
मुख्यमंत्री ह प्रतिनिधि मंडल ल विश्वास देवाइस कि ए प्रकरण म बइगा आदिवासी मन ल न्याय देवाए जाही। ग्राम पंचायत अर्जुनी, कोरगापार अऊ देवरी (क) (विकासखंड-गुण्डरदेही) जिला बालोद के सरपंच अऊ आन प्रतिनिधि मन ह मुख्यमंत्री ल ज्ञापन संउप के खपरी जलाशय ले 10 गांव मन बर पेयजल आपूर्ति के व्यवस्था करवाए के आग्रह करिन। उमन मुख्यमंत्री ल बताइन कि ए जलाशय ले नल-जल योजना बर सर्वेक्षण पूरा हो गए हे। एकर निर्माण होए म अर्जुनी, सकरौद, गोरकापार, खपरी, सिरसिदा, परसदा संग दस गांव मन के मनखे मन ल बहुत पानी मिल सकही।




मुख्यमंत्री ह उंखर ज्ञापन लोक स्वास्थ्य यांत्रिकी विभाग के सचिव ल जरूरी कार्रवाई बर भेजवाइन। ग्राम पंचायत बड़ेदेवगांव (तहसील खरसिया) जिला रायगढ़ के गांव वाले मन ह घलोक मुख्यमंत्री ले मुलाकात करिन। उमन डॉ. सिंह ल ज्ञापन संउप के ग्राम बड़े देवगांव के शासकीय हाई स्कूल के उन्नयन हायर सेकेण्डरी स्कूल के रूप म करे के अनुरोध करिन। मुख्यमंत्री ह उंखर ज्ञापन स्कूल शिक्षा मंत्री श्री केदार कश्यप ल भेजवाईन।