अमेरिका म घलोक ‘सखी वन स्टॉप सेंटर’ जइसे संस्था के स्थापना के जरुरत – श्री एडगर्ड डी कैगन

अमेरिका के वाणिज्यिक दूतावास के काउंसल जनरल ह करिस
देश अऊ प्रदेश के पहिली वन स्टॉप सेंटर ‘सखी’ के अवलोकन

रायपुर 21 नवम्बर 2017। अमेरिका के वाणिज्यिक दूतावास के काउंसल जनरल श्री एडगर्ड डी कैगन ह आज इहां रायपुर स्थित देश अऊ प्रदेश के पहिली वन स्टॉप सेंटर ‘सखी’ के अवलोकन करिन। उमन कहिन कि महिला मन के विरुद्ध होवत हिंसा ल खतम करे अऊ उनला हिंसा ले संरक्षण अऊ सुरक्षा प्रदान करे बर भारत के महिला अउ बाल विकास मंत्रालय कोति ले होए ये उदीम बहुत सराहनीय हे जेमां एके छत के तरी महिला मन ल चिकित्सकीय, विधिक सहायता, मनोवैज्ञानिक सलाह अऊ परामर्श के सुविधा अऊ मार्गदर्शन के संगें संग संरक्षण घलोक प्रदान करे जात हे। महिला मन बर भयमुक्त वातावरण बनाए म अऊ ओ मन ल न्याय देवाए म इंकर महत्वपूर्ण भूमिका हे।




उमन इहां के कार्य प्रणाली के प्रशंसा करिन अऊ कहिन कि अमेरिका म महिला मन के प्रति बढ़त हिंसा ल देखत उहां घलोक अइसन पहल करे के जरूरत हे, ए खातिर ओ मन इहां ए संस्था के कार्यप्रणाली के अध्ययन करे आये हें। उमन ए बात म घलोक खुशी जाहिर करिन के छत्तीसगढ़ देश के पहली राज्य हे जेमां म हर एक जिला म अइसन वन स्टॉप सेंटर खोले गए हे। उमन ए अवसर म इहां के सहायक अधीक्षिका श्रीमती प्रीती पाण्डेय ल स्मृति चिन्ह घलोक भेंट करिन। आप मन ल बता दन के कि 16 जुलाई 2015 के दिन स्थापित सखी वन स्टॉप सेंटर म अब तक दहेज प्रताड़ना, घरेलु हिंसा, मानसिक प्रताड़ना आदि ले जुड़े 1506 प्रकरण दर्ज करे गए हे जेमां ले 966 के निराकरण करे जा चुके हे।




ए अवसर म महिला अउ बाल विकास विभाग के अपर संचालक श्रीमती पद्मिनी भोई ह कहिन कि प्रदेश बर गौरव के बात हे कि महिला सशक्तिकरण अऊ महिला मन ल अपराध ले संरक्षण बर राज्य सरकार कोति ले करे जात उदीम मन ल अंतर्राष्ट्रीय स्तर म पहिचान मिलत हे। ए अवसर म जिला महिला अउ बाल विकास अधिकारी श्री अशोक पाण्डेय संग सखी वन स्टॉप सेंटर म कार्यरत अधिकारी अउ कर्मचारी घलोक मौजूद रहिन।