आम जनता विकास कार्य म सहभागी बनंय – प्रभारी मंत्री श्री चन्द्राकर

समीक्षा बैठक अउ जनसंपर्क कार्यक्रम

जांजगीर-चांपा, 21 नवंबर 2017। पंचायत अउ ग्रामीण विकास, लोक स्वास्थ्य अउ कुटुंब कल्याण मंत्री अउ जिला के प्रभारी श्री अजय चन्द्राकर ह आज जैजैपुर के सद्भावना भवन अउ सक्ती के हाईस्कूल परिसर मं समीक्षा बैठक लीन अऊ जनसंपर्क कार्यक्रम के तहत आमजनता ले मुलाकात करिन। श्री चन्द्राकर ह सक्ती म दू करोड़ ले जादा के विकास कार्य मन के लोकार्पण अउ भूमिपूजन करिन।




प्रभारी मंत्री श्री चन्द्राकर ह जनसंपर्क अउ समीक्षा बैठक के बेरा उपस्थित जनसमूह ल संबोधित करत कहिन कि आम जनता प्रशासन ले सीधा जुरके विकास कार्य म सहभागी बनंय। संवेदनशील सरकार के योजना मन के लाभ आम जनता ल मिलना चाही। इही उद्देश्य ले ये कार्यक्रम आयोजित करे गए हे। उमन जनसंपर्क के बेरा म मिले आवेदन मन म नियमानुसार कार्रवाई बर संबंधित विभाग के अधिकारी मन ल निर्देशित करिन।




प्रभारी मंत्री ह सक्ती मं कार्यक्रम के बेरा दू करोड़ रूपिया ले जादा के कार्य मन के लोकार्पण अउ शिलान्यास करिन। ग्राम खैरा म सामुदायिक भवन, सरवानी व लहंगा म सीसी रोड अऊ सरवानी म प्राथमिक शाला भवन के शिलान्यास करिन। इही प्रकार मनरेगा के तहत कर्रानाला अऊ कोतरी नाला म स्टापडेम, जिला खनिज न्यास मद ले पोरथा म उप स्वास्थ्य केन्द्र भवन, बरपालीकला अऊ धनपुर के हाई स्कूल म अहाता, मुख्यमंत्री पूर्ण ग्रामीण विकास योजना के तहत ग्राम टेमर म व्यवसायिक परिसर, अर्जुनी, गहरीनमुड़ा अउ मोहगांव म नवां पंचायत भवन अऊ पोरथा म मिनीस्टेडियम के लोकार्पण करिन।




कार्यक्रम के समय लोकसभा सांसद श्रीमती कमला देवी पाटले, सक्ती विधायक डॉ. खिलावन साहू, विधानसभा के पहिली उपाध्यक्ष श्री नारायण प्रसाद चंदेल, पूर्व मंत्री श्री मेघाराम साहू, कलेक्टर डॉ एस. भारतीदासन, एसपी श्री अजय यादव, जिला पंचायत सीईओ श्री अजीत वसंत, वनमण्डला अधिकारी श्रीमती सतोविशा समाजदार संग त्रि-स्तरीय पंचायत अउ नगरीय निकाय के जनप्रतिनिधि उपस्थित रहिन।