खाद्य मंत्री ह करिन धान खरीदी काम मन के समीक्षा : धान के अवैध परिवहन म कानूनी कार्रवाई के निर्देश

रायपुर, 22 नवम्बर 2017। खाद्य, नागरिक आपूर्ति अउ उपभोक्ता संरक्षण मंत्री श्री पुन्नूलाल मोहले ह आज इहां मंत्रालय (महानदी भवन) म विभागीय बैठक लेके धान खरीदी ले संबंधित काम मन के समीक्षा करिन। श्री मोहले ह विभाग के सचिव श्री एम.के. सोनी ले अब तक के प्रगति के जानकारी लीन।




उमन धान खरीदी केन्द्र मन म किसान मन ल कोनो प्रकार के असुविधा झन होवय ए बात म विशेष ध्यान रखे अऊ धान खरीदी केन्द्र म बारदाना मन के भरपूर उपलब्धता अउ सीमावर्ती जिला मन के धान खरीदी केन्द्र मन के सतत निगरानी के निर्देश दीन। श्री मोहले ह धान के अवैध परिवहन अउ कोचिया मन के विरूद्ध नियमानुसार कानूनी कार्रवाई करे के घलोक निर्देश दीन। बैठक म विशेष सचिव श्री सोनी ह बताइस कि खरीफ विपणन साल 2017-18 म अब तक 79 हजार 085 किसान मन ले तीन लाख तीन हजार मीटरिक टन धान के खरीदी हो गे हे। एखर बर किसान मन ल लगभग 475 करोड़ रूपिया के ऑनलाईन भुगतान करे गए हे।




श्री सोनी ह ये बताइस कि अब तक 20 जिला मन म अवैध परिवहन के 154 प्रकरण बनाय गे हे अउ 9750 क्विंटल धान अऊ 37 वाहन जब्त करे हे। उमन बताइस कि राईस मिल मन के घलोक भौतिक सत्यापन करे जात हे, अब तक 20 हजार 396 क्विंटल अवैध धान अऊ आठ हजार 838 क्विंटल अवैध चावल जब्त करे गए हे। अइसन मिलर मन के विरूद्ध छत्तीसगढ़ मंडी बोर्ड अधिनियम के तहत कार्रवाई करे गए हे। प्रदेश म समर्थन मूल्य म किसान मन ले धान खरीदी ए महीना के 15 तारीक ले शुरू हो गए हे, जऊन 31 जनवरी 2018 तक चलही।