अब अभिभावक मन के करीब 5 करोड़ रूपिया हर साल बांचही

देश बर मॉडल बनिस रायपुर के केन्द्रीय विद्यालय नं.2 : सांसद श्री बैस
जिला खनिज निधि ले केन्द्रीय विद्यालय बर भवन बनइया देश के पहिली जिला रायपुर
नवा भवन के बने ले रायपुर के 1100 अकतहा लइका मन ल मिलही केन्द्रीय विद्यालय के लाभ
केन्द्रीय विद्यालय म करीब 3.5 करोड़ रूपिया के विकास कार्य मन के भूमिपूजन अऊ लोकार्पण

रायपुर, 01 दिसंबर 2017। रायपुर लोकसभा क्षेत्र के सांसद श्री रमेश बैस ह कहिन के राजधानी रायपुर के दीनदयाल उपाध्याय नगर म संचालित केन्द्रीय विद्यालय क्रमांक-2 पूरा देश के केन्द्रीय विद्यालय मन बर एक मॉडल स्कूल बनही अऊ एक नवा पहिचान स्थापित करही। ये देश के पहिली अइसन केन्द्रीय विद्यालय ये, जिहां मुख्यमंत्री डॉ. रमन सिंह के नेतृत्व म राज्य सरकार अऊ जिला प्रशासन कोति ले जिला खनिज निधि ले स्कूल बर भवन बनाए जात हे। ए भवन के बने ले राजधानी रायपुर के करीब 1100 अकतहा लइका मन ल केन्द्रीय विद्यालय म अध्ययन करे के अवसर मिलत हे। श्री बैस ह कहिन कि एक लइका ल निजी स्कूल म पढ़ाए ले जिहां साल म करीब 50 हजार रूपिया तक खरचा होथे। ये ढाई करोड़ के भवन बन जाय ले 1100 लइका मन ल गुणवत्तापूर्ण शिक्षा मुहैया होही जेखर से अभिभावक मन के करीब 5 करोड़ रूपिया हर साल बांचही।




श्री बैस आज इहां केन्द्रीय विद्यालय क्रमांक-2 म जिला खनिज निधि ले स्वीकृत करीब साढ़े तीन करोड रूपिया के विकास कार्य मन के भूमिपूजन अऊ लोकार्पण करत ये बात कहिन। ए अवसर म कार्यक्रम के अध्यक्षता छत्तीसगढ़ शासन के कृषि अउ जल संसाधन मंत्री श्री बृजमोहन अग्रवाल ह करिन। स्कूल शिक्षा मंत्री श्री केदार कश्यप, रायपुर के महापौर श्री प्रमोद दुबे, रायपुर ग्रामीण के विधायक श्री सत्यनारायण शर्मा, रायपुर उत्तर के विधायक श्री श्रीचंद सुन्दरानी, छ.ग. भवन अउ आन सन्निर्माण कर्मकार कल्याण मण्डल के अध्यक्ष श्री मोहन एंटी, उपाध्यक्ष श्री सुभाष तिवारी, पार्षद श्रीमती मिनल चौबे विशिष्ट अतिथि के रूप म उपस्थित रहिन।