बेनीराम के बूढ़ाए आंखी ल मिलीस अंजोर : स्मार्ट कार्ड ले होइस मोतियाबिंद के ऑपरेशन

कहिन कि इलाज के रूपिया 50 हजार करई हे बड़ लाभकारी

धमतरी 01 दिसम्बर 2017। धमतरी के ग्राम दर्री म रहइया 62 साल के बुजुर्ग श्री बेनीराम पांड़े फेर अपन आंखी ले दुनिया के लाल-गुलाली देख सकहीं। शासकीय जिला चिकित्सालय धमतरी म मोतियाबिंद के उपचार होए के बाद उंखर बूढ़वा आंखीं ल फेर अंजोर मिल सकही। पेशा ले कुम्हार श्री बेनीराम ह बताइस कि पाछू दू बछर ले वो ह अपन आंखी ले बने सहिन देख नइ पात रहिस। सब जिनिस जाला कस अऊ झ़ंझरहा दिखय। गरीब होए के सेती ओ ह अइसनहे काम चलात रहिस। गांव के मितानिन श्रीमती ममता साहू ह बताइस कि मुख्यमंत्री स्वास्थ्य बीमा योजना के तहत बनाय गए स्मार्ट कार्ड ले मोतियाबिंद के आसानी ले इलाज हो सकत हे अऊ अब अकटूबर 2017 ले मुफ्त इलाज के लिमिट 30 हजार ले बाढ़के 50 हजार रूपिया हो गए हे।




मितानिन श्रीमती साहू ओ मन ल लेके जिला अस्पताल आईन जिहां श्री बेनीराम के आंखी के ऑपरेशन विशेषज्ञ चिकित्सक डॉ. खालसा कोति ले करे गीस। इलाज के बाद श्री बेनीराम के स्मार्ट कार्ड के खाता 50 हजार रूपिया म छह हजार रूपिया के कटौती ओ ऑपरेशन के एवज म होइस। उमन प्रदेश के मुख्यमंत्री डॉ. रमन सिंह बर आभार प्रकट करत कहिन कि स्मार्ट कार्ड ले अब 50 हजार रूपिया तक के मुफ्त इलाज होना मरीज मन बर बहुत बने खबर हे। उमन बताइस कि बूढ़ापा म कई ठन बीमारी मन शरीर ल घेर लेथें। अइसन म स्मार्ट कार्ड के संग 50 हजार रूपिया तक के अब मुफ्त इलाज होए ले गरीब मनखे मन बर ये योजना अड़बड़ फायदा वाला साबित होही। उमन कहिन कि, मुख्यमंत्री ह जनता के स्वास्थ्य सुविधा बर ये काम करके बड़ नेक काम करे हे। आप मन ल हम बता देवन कि अभी हाल म जिला म एक लाख 76 हजार 232 स्मार्ट कार्ड धारक हे, जऊन कुल पंजीकृत परिवार मन के 97 प्रतिशत हे।