कृषि अऊ जल संसाधन मंत्री श्री बृजमोहन अग्रवाल ह दीस विभागीय उपलब्धि मन के जानकारी

छत्तीसगढ़ म नदी मन ल जोरे के तइयारी
इंटर लिकिंग परियोजना बर सर्वेक्षण जारी
खेती-किसानी बर 1500 करोड़ रूपिया के ‘चिराग’ परियोजना के प्रस्ताव
राज्य के चार लाख किसान परिवार अऊ 50 हजार युवा जुड़हीं ‘चिराग’ परियोजना ले
प्रदेश के सिंचाई क्षमता म सात गुना बढ़ोतरी
अभियान चलाके तीन वृहद, छह मध्यम अऊ 440 छोटे सिंचाई योजना मन के निर्माण पूरा करे गीस
नदी-नाला मन म बनाए गीस 651 स्टाप डेम



रायपुर, 05 दिसम्बर 2017। जल संसाधन विभाग ह सिंचाई सुविधा मन के विस्तार बर छत्तीसगढ़ म नदिया मन ल आपस म जोरे के तैयारी शुरू कर देहे हे। कृषि अऊ जल संसाधन मंत्री श्री बृजमोहन अग्रवाल ह आज इहां बताइस कि एखर खातिर इंटर लिकिंग परियोजना बनाए गए हे अऊ सर्वेक्षण करवाए जात हे। एमां महानदी-तांदुला, पैरी-महानदी, रेहर, अटेम, अहिरन-खारंग अऊ हसदेव-केवई इंटरलिकिंग परियोजना सामिल हे। श्री अग्रवाल ह बताइस कि ए नदिया मन म बने सिंचाई बांध मन म जब शत-प्रतिशत जल भराव हो जाही त ओखर बाद उहां के अकतहा पानी के समुचित उपयोग करे बर ये वाले परियोजना तैयार करे गए हे।

श्री अग्रवाल ह आज इहां अपन विभाग मन (जल संसाधन, कृषि, पशुपालन, मछलीपालन अऊ धर्मस्व) के 14 साल के उपलब्धि मन के जानकारी देवत रहिन। उमन बताइन कि प्रधानमंत्री श्री नरेन्द्र मोदी ह देश के किसान मन के आमदनी साल 2022 तक दुगुना करे के जऊन लक्ष्य निरधारित करे हे, ओला पूरा करे बर छत्तीसगढ़ म सिंचाई सुविधा मन के विस्तार करत खेती-किसानी बर कई बेहतरीन योजना शुरू करे गए हे। एमां राज्य शासन कोति ले प्रस्तावित चिराग योजना घलोक सामिल हे। उमन ये घलोक बताइन कि चिराग योजना बर 1500 करोड़ रूपिया के प्रस्ताव तैयार करे गए हे। एखर बर विश्व बैंक ले सहायता लेहे जाही। ए योजना म अंदाजन चार लाख किसान परिवार मन ल जोरे जाही। ऊंखर उत्पादन समूह बनाए जाही अऊ करीबन छै हजार कृषि उद्यम मन के स्थापना करे जाही। करीब 50 हजार युवा मन ल घलोक चिराग योजना ले जोड़के ओ मन ल खेती-किसानी ले संबंधित कौशल उन्नयन के प्रशिक्षण दे जाही।



आपमन जानतेच होहू कि मुख्यमंत्री डॉ. रमन सिंह के सरकार ए महीना के सात तारीक के 14 साल पूरा करके 15वां साल म अऊ 12 दिसम्बर के तीसर पारी के चार साल पूरा कर पांचवा साल म प्रवेश करही। मंत्रिपरिषद म लेहे गए निर्णय के अनुसार एखर उपलक्ष्य म सबो विभाग मन के मंत्रिगण पत्रकार वार्ता लेके मीडिया ल अपन-अपन विभाग मन के 14 साल के उपलब्धि मन के जानकारी देवत हें। इही कड़ी म श्री बृजमोहन अग्रवाल ह आज पत्रकार वार्ता म मीडिया ल ए उपलब्धि मन के जानकारी दीन। ऊंखर संग कृषि विभाग के अपर मुख्य सचिव श्री अजय सिंह, जल संसाधन विभाग के सचिव श्री सोनमणि बोरा, विभाग के प्रमुख अभियंता श्री एच.आर कुटारे, कृषि विभाग के संचालक श्री एम.एस. केरकेट्टा, मछली पालन विभाग के संचालक श्री व्ही.के. शुक्ला, इंदिरा गांधी कृषि विश्व विद्यालय के कुलपति डॉ. एस.के. पाटिल अऊ आन संबंधित विभाग मन के वरिष्ठ अधिकारी घलोक उपस्थित रहिन।