रमन सरकार ह आज पूरा करिस 14 साल

सरकार के हर कामयाबी प्रदेश के मेहनतकश जनता के सेती: डॉ. रमन सिह
मुख्यमंत्री ह अपन सरकार के 14 साल पूरा होए अऊ 15वां साल म आये म जनता ल दीन धन्यवाद

रायपुर, 06 दिसम्बर 2017। मुख्यमंत्री डॉ. रमन सिंह ह सात दिसम्बर के दिन राज्य म अपन सरकार के तीन पारी के 14 साल पूरा होए अऊ 15वां साल म आये के अवसर म जनता के प्रति आभार व्यक्त करिन हे अऊ प्रदेशवासी मन ल बधाई देहे हे। उमन आज इहां जारी संदेश म कहिन कि प्रदेशवासी मन के भरपूर स्नेह, सहयोग अऊ अपार जनसमर्थन ले राज्य सरकार ह देखते देखत 14 साल पूरा कर लिए हे। डॉ. सिंह ह ए दौरान सरकार ल मिले हर कामयाबी के श्रेय प्रदेश के मेहनतकश जनता ल देहे हे। डॉ. रमन सिंह ह कहिन – पाछू 14 बछर के ए यात्रा म छत्तीसगढ़ ह देश के सबले तेज गति ले आगू बढ़इया राज्य के रूप म अपन पहिचान बनाये हे अऊ राष्ट्रीय अउ अंतर्राष्ट्रीय स्तर म प्रतिष्ठा हासिल करे हे। ए दौरान प्रधानमंत्री श्री नरेन्द्र मोदी के नेतृत्व म केन्द्र म नवा सरकार के गठन के बाद ‘सबके साथ सबका विकास‘ के भावना के मुताबिक छत्तीसगढ़ जइसे नवा राज्य म घलोक विकास के रफ्तार तेज हो गए हे।



आप मन जानतेच होहू कि डॉ. रमन सिंह ह साल 2003 म छत्तीसगढ़ विधानसभा के पहिली आम चुनाव म जनादेश मिले के बाद पहली पइत सात दिसम्बर 2003 के दिन राजधानी रायपुर के पुलिस परेड मैदान म आयोजित समारोह म हजारों मनखे मन के बीच शपथ ग्रहण करके मुख्यमंत्री पद के कार्यभार सम्हाले रहिन। उमन साल 2008 म विधानसभा के दूसर अऊ साल 2013 म तीसर आम चुनाव म भारी बहुमत ले अपन सरकार के गठन करे रहिन। दुसर पारी म 12 दिसम्बर 2008 अऊ तीसर पारी म घलोक 12 दिसम्बर 2013 के दिन उमन रायपुर के पुलिस लाईन मैदान म आम जनता के बीच शपथ ग्रहण करके सरकार के बागडोर सम्हाले रहिन। ऊंखर तीसर कार्यकाल के चार साल ए महीना के 12 तारीक को पूरा होवत हे। एला मिलाके राज्य भर म ‘14 साल बेमिसाल’ के जोशीला नारा के संग कई आयोजन के तैयारी करे जात हे।



मुख्यमंत्री ह अपन सरकार के 15वां साल म आये के उल्लेख करत आज कहिन कि व्यापक जनसमर्थन ले हमला छत्तीसगढ़ महतारी के सेवा बर शक्ति मिलथे। उमन कहिन -राज्य ल कई ठन योजना मन अऊ विकास के कई ठन क्षेत्र मन म सरलग मिलत कामयाबी के श्रेय प्रदेश के मेहनतकश जनता ल दे जाना चाही। पाछू 14 साल म राज्य सरकार ह अपन हर दिन अऊ हर एक पल छत्तीसगढ़ के गांव, गरीब अऊ किसान मन अउ समाज के सबो वर्ग के बेहतरी बर काम करे म लगाए हे। उमन कहिन – चौबीसों घंटा बिजली के व्यवस्था करके, गरीब मन बर देश के पहला खाद्य सुरक्षा कानून बनाके, युवा मन ल कौशल उन्नयन के अधिकार देके, किसान मन ल ब्याज मुक्त कृषि ऋण के सुविधा देके, वनवासि मन ल वन अधिकार मान्यता पत्र देके अऊ अमीर-गरीब के भेदभाव ले परे राज्य के सबो परिवार मन ल 50 हजार रूपिया तक स्वास्थ्य बीमा के सुविधा देके छत्तीसगढ़ ह देश अऊ दुनिया म ख्याति अर्जित करे हे।

ए दौरान तेन्दूपत्ता संग्राहक मन बर पारिश्रमिक दर 450 रूपिया ले बढ़ाके 2500 रूपिया कर देहे गए हे। अइसन करईया घलोक छत्तीसगढ़ देश के पहला राज्य हे। उमन कहिन – किसान मन ले निरधारित समर्थन मूल्य म धान खरीदी के सबले बढ़िया व्यवस्था छत्तीसगढ़ सरकार ह करे हे। आदिवासी मन, अनुसूचित जाति मन अऊ पिछड़े वर्ग के विकास बर चार विशेष क्षेत्र विकास प्राधिकरण बनाय गए हे। नक्सल हिंसा पीड़ित दंतेवाड़ा जिला म बड़का एजुकेशन सिटी बनाके अऊ मुख्यमंत्री बाल भविष्य सुरक्षा योजना के तहत राज्य के पांच संभागीय मुख्यालय मन म प्रयास आवासीय विद्यालय बनाके हजारों लइका मन ल मेडिकल अऊ इंजीनियरिंग शिक्षा बर निःशुल्क कोचिंग देहे जात हे। स्कूल शिक्षा, उच्च शिक्षा, तकनीकी शिक्षा, स्वास्थ्य, सिंचाई, सड़क, संचार, बिजली, पेयजल संग जनता के जीवन ले जुरे हर बुनियादी जरूरत ल सरकार सर्वोच्च प्राथमिकता के संग पूरा करत हे। मुख्यमंत्री ह उम्मीद जताइन कि प्रदेश वासी मन के निरंतर सहयोग ले छत्तीसगढ़ अवइया कुछ बछरम देश के सबले विकसित राज्य मन के श्रेणी म सामिल हो जाही।