नक्सल प्रभावित इलाका मन अऊ नवा जिला मन म अधोसंरचना विकास म मिलीस शानदार कामयाबी: श्री राजेश मूणत

प्रदेश म लोक निर्माण विभाग के बजट 229 करोड़ ले बढ़के 7795 करोड़ रूपिया तक पहुंचिस
नश रायपुर म साल 2030 तक पांच लाख मनखे मन ल बसाए के लक्ष्य
नक्सल प्रभावित बस्तर अंचल म 1890 किलोमीटर सड़क मन के निर्माण पूरा

रायपुर, 07 दिसम्बर 2017। लोक निर्माण, गृह अऊ पर्यावरण मंत्री श्री राजेश मूणत ह कहिन कि राज्य के सुदूरवर्ती नक्सल प्रभावित इलाका मन अऊ नवगठित जिला मन म सड़क मन, पुल-पुलिया मन अऊ सरकारी भवन मन के संग कई ठन बुनियादी संरचना के विकास ल प्रदेश सरकार ह एक चुनौती के रूप म लीस अऊ ए दिशा म पाछू 14 बछर म शानदार कामयाबी हासिल करिस। श्री मूणत आज इहां न्यू सर्किट हाउस म स्थानीय मीडिया प्रतिनिधि मन ल प्रदेश सरकार के 14 साल के उपलब्धि मन के जानकारी देत रहिन।



उमन बताइन कि 21वीं सदी के स्मार्ट शहर के रूप म तेजी ले विकसित होवत नवा रायपुर म साल 2030 तक पांच लाख आबादी ल बसाहट देहे के लक्ष्य हे। नवा रायपुर म मंत्रालय अऊ विभागाध्यक्ष भवन मन संग कई सरकारी दफ्तर मन के भवन अऊ कई आवासीय कालोनी मन के निर्माण करे गए हे।परिवहन विभाग कोति ले आम जनता के सुविधा बर राज्य म सबो चेक पोस्ट खतम कर देहे गए हे अऊ सबो जिला परिवहन कार्यालय मन के कम्प्यूटरीकरण करत ओ मन ल आनलाइन कर दे गए हे। पर्यावरण सुधार के दृष्टि ले ई-रिक्शा मन ल बढ़ावा देहे जात हे। उमन ये घलोक बताइन कि राज्य सरकार ह ई-रिक्शा मन ल परिवहन टैक्स ले पांच साल बर छूट देहे के घलोक निर्णय लेहे हें।

श्री मूणत के संग पत्रकार वार्ता म गृह निर्माण मंडल के अध्यक्ष श्री भूपेन्द्र सवन्नी, परिवहन विभाग के अपर मुख्य सचिव श्री बी.व्ही.आर. सुब्रमण्यम, लोक निर्माण विभाग के सचिव श्री सुबोध कुमार सिंह, परिवहन विभाग के सचिव श्री अरूणदेव गौतम, घर अउ पर्यावरण विभाग के सचिव श्री संजय शुक्ला अऊ आन संबंधित वरिष्ठ अधिकारी उपस्थित रहिन।