कुपोषण मुक्ति अऊ महिला सशक्तिकरण म मिलीस उत्साहजनक सफलता: श्रीमती रमशीला साहू

महिला अउ बाल विकास अऊ समाज कल्याण मंत्री ह दीन 14 बछर के उपलब्धि मन के जानकारी

रायपुर, 07 दिसम्बर 2017। महिला अउ बाल विकास अऊ समाज कल्याण मंत्री श्रीमती रमशीला साहू ह कहिन कि लइका मन ल कुपोषण ले मुक्ति देवाए अऊ महिला मन के सशक्तिकरण बर छत्तीसगढ़ म पाछू 14 साल म चलाए गए अभियान मन ल उत्साहजनक सफलता मिले हे। मुख्यमंत्री डॉ. रमन सिंह के प्रेरणा ले दुनों अभियान अब छत्तीसगढ़ म जन-आंदोलन बन गए हे। महिला मन के आर्थिक स्वावलम्बन बर करीबन 33 हजार स्व-सहायता समूह बनाके ओ मन ल छत्तीसगढ़ के महिला-कोष योजना के तहत करीबन 70 करोड़ रूपिया के करजा देहे गए हे।



श्रीमती साहू ह आज संझा इहां नवीन विश्राम भवन म आयोजित पत्रकारवार्ता म बताइन -कुपोषण मुक्ति बर आंगनबाड़ी केन्द्र मन के स्तर म चलत गतिविधि मन के फलस्वरूप प्रदेश म कुपोषण के दर अड़बड़ कमती हो गए हे। उमन कहिन कि कुपोषण के खिलाफ लड़ई हम सब बर एक बड़का चुनौती हे। ये मां सरकार के प्रयास ल समाज के भागीदारी ले लगातार अच्छा सफलता मिलत हे। श्रीमती साहू ह मुख्यमंत्री डॉ. रमन सिंह के निरंतर जारी कार्यकाल के 14 साल म आज ओ मन ल बधाई दीन अऊ ऊंखर प्रति शुभेच्छा प्रकट करिन। श्रीमती साहू ह पत्रकार वार्ता म बताइन कि महिला अउ बाल विकास विभाग के बजट पाछू 14 साल म 192 करोड़ रूपिया ले बढ़के 1810 करोड़ 21 लाख रूपिया अऊ समाज कल्याण विभाग के बजट 96 करोड़ रूपिया ले बढ़के वित्तीय साल 2017-18 म बढ़कर 865 करोड़ 12 लाख हो गए हे। पत्रकार वार्ता म श्रीमती रमशीला साहू के संग महिला अउ बाल विकास विभाग के सचिव डॉ. एम. गीता, विभाग के आयुक्त श्री आर. प्रसन्ना, समाज कल्याण विभाग के संचालक डॉ. संजय अलंग अऊ आन संबंधित वरिष्ठ अधिकारी उपस्थित रहिन।