जगदलपुर

जगदलपुर एयरपोर्ट ले नागर विमानन सेवा होइस चालू

  • प्रधानमंत्री ह झंडी देखाके जगदलपुर के एयरपोर्ट ले विमान ल करिन रवाना

जगदलपुर, दिनांक 14 जून 2018। जगदलपुर के एयरपोर्ट अब नागर विमानन सेवा के नक्शा म जुड़ गे। 14 जून के दिन प्रधानमंत्री श्री नरेन्द्र मोदी के झंडी देखाके जगदलपुर के एयरपोर्ट ले विमान ल रायपुर बर रवाना करतेच एयरपोर्ट म उपस्थित जनसमूह ह करतल अवाज के संग ए क्षण के स्वागत करिन। एखर संगेच एयरपोर्ट के बाहिर घलोक आतिशबाजी के माध्यम ले जनता ह अपन उल्लास के प्रदर्शन करिन। आप मन ल बता देवन के प्रधानमंत्री श्री नरेन्द्र मोदी ह भिलाई के जयंती स्टेडियम ले जगदलपुर म नागर विमानन सेवा के शुभारंभ करिन। अउ जगदलपुर म नागर विमानन सेवा चालू करे बर इहां के विमानतल के विस्तार काम करीबन 40 करोड़ रुपए के लागत ले करे गए हे। प्रधानमंत्री के जगदलपुर म नागर विमानन सेवा चालू करे के संगेच ये प्रदेश के दूसरा एयरपोर्ट बन गए हे, जिहां ये सुविधा हवय। अभी हाले म जगदलपुर ले रायपुर अऊ विशाखापट्टनम बर नागरिक मन ल हवाई यात्रा के सुविधा मिलही अऊ करीबन 300-300 किलोमीटर के दूरी म स्थित ये दुनों शहर आधा ले पौना घंटा के दूरी म होही।
विमान ल रवाना होए के पहिली वाटर केनन के माध्यम ले सलामी दे गइस अऊ कैप्टन कुणाल अउ कैप्टन जोश यात्रि मन ल लेके रायपुर बर रवाना होइन। ए अवसर म जगदलपुर म आदिम जाति कल्याण मंत्री श्री केदार कश्यप, सांसद श्री दिनेश कश्यप, जगदलपुर विधायक अउ छत्तीसगढ़ पर्यटन मंडल के अध्यक्ष श्री संतोष बाफना, वन विकास निगम के अध्यक्ष श्री श्रीनिवास राव मद्दी, नगर निगम के महापौर श्री जतीन जायसवाल, जिला पंचायत अध्यक्ष श्रीमती जबिता मंडावी, पूर्व विधायक श्री बैदूराम कश्यप, पूर्व महापौर श्री किरण देव, कमिश्नर श्री दिलीप वासनीकर, पुलिस महानिरीक्षक श्री विवेकानंद सिन्हा, कलेक्टर श्री धनंजय देवांगन, पुलिस अधीक्षक श्री डी श्रवण, जिला पंचायत के मुख्य कार्यपालन अधिकारी श्री प्रभात मलिक संग जनप्रतिनिधिगण अउ बड़ संख्या म नागरिक उपस्थित रहिन।

मुहाचाही:  जगदलपुर ले हवाई यात्रा के सुविधा ले मिलही विकास ल रफ्तार : मंत्री श्री कश्यप