केदार कश्यप जगदलपुर

जगदलपुर ले हवाई यात्रा के सुविधा ले मिलही विकास ल रफ्तार : मंत्री श्री कश्यप

  • एयरपोर्ट ले विमान के रवाना होए के पहिली, पहिली यात्री मन ल सौंपिन बोर्डिंग पास

जगदलपुर, दिनांक 14 जून 2018। जगदलपुर ले नागर विमानन सेवा के चालू होए म आदिम जाति कल्याण अउ स्कूल शिक्षा मंत्री श्री केदार कश्यप ह कहिन कि एखर से पूरा बस्तर म विकास ल गति मिलही। उमन आज के दिन ल बस्तर बर बहुत महत्वपूर्ण बतात कहिन कि बस्तर म चारो तरफ तेज गति ले विकास काम होवत हे। उमन जगदलपुर म एयरपोर्ट के शुभारंभ अऊ रायपुर ले जगदलपुर तक राष्ट्रीय राजमार्ग के उन्नयन के उदाहरण देवत कहिन कि एखरे संगेच कांकेर जिला के भानुप्रतापपुर रेलमार्ग ले घलोक जुड़ गीस अऊ लउहेच नारायणपुर अऊ कोंडागांव घलोक जुड़ जाही। उमन कहिन कि आज के दिन बस्तर बर बहुत सौभाग्यशाली दिन हे अउ बस्तर म हवाई यात्रा के शुभारंभ के संगेच आज हमन नवा युग म प्रवेश करत हवन। उमन कहिन कि पहली उड़ान म अबुझमाड़ के लालू राम मंडावी, दिव्यांग छात्रा गुरुवारी कश्यप, आईआईटी क्वालिफायर राहुल, नीट क्वालिफायर इंदु, तेंदूपत्ता संग्राहक हरावती, बालीकोंटा के महिला सरपंच तायमनी के सफर नवा पीढ़ी ले लेके भविष्य के पीढ़ी बर ए सेवा के महत्व ल बताथे।
ए अवसर म सांसद श्री दिनेश कश्यप ह कहिन कि ये बस्तर के इतिहास म एक नवा अध्याय हे। उमन कहिन कि प्रधानमंत्री श्री मोदी ह हवाई चप्पल म चलइया मनखे मन ल घलोक हवाई यात्रा के सुविधा के जऊन संकल्प ले रहिन, आज वो बस्तर म साकार होवत हे। उमन कहिन कि केन्द्र सरकार कोति ले बस्तर के विकास बर कई महत्वपूर्ण काम करे जात हे। बस्तर म आज के दिन विकास के एक नवा द्वार खुले हे, जब इहां ले नागर विमानन सेवा चालू करे जात हे। उमन कहिन कि जल्‍दीच ए सेवा के विस्तार करे जाही अऊ दुसर शहर मन बर घलोक विमान सेवा चालू करे जाही। ए अवसर म विधायक श्री संतोष बाफना ह एला बस्तर बर बहुत हर्ष अऊ प्रसन्नता के अवसर बताइस। ए अवसर म कलेक्टर श्री धनंजय देवांगन ह एला बस्तर बर ऐतिहासिक क्षण बतात कहिन कि आज बस्तर के बहुप्रतीक्षित मांग पूरा हो गीस। उमन बताइन कि ए एयरपोर्ट के विस्तार काम करीबन 40 करोड़ रुपए के लागत ले करे गए हे अउ इहां ले उड़ान योजना के तहत विमान मन के संचालन करे जाही। उमन ए काम बर कई ठन एजेंसी मन के सहयोग बर आभार घलोक व्यक्त करिन।
जगदलपुर ले रायपुर बर पहली उड़ान भरत विमान के सबो यात्रि मन ल ए अवसर म अतिथि मन कोति ले बोर्डिंग पास के संगेच पुष्प अउ स्मृति चिन्ह घलोक प्रदाय करे गीस। एखरे संगेच क्रू के सदस्य मन ल ए अवसर म बेटन घलोक प्रदाय करे गीस। ए अवसर म वन विकास निगम के अध्यक्ष श्री श्रीनिवास राव मद्दी, नगर निगम के महापौर श्री जतीन जायसवाल, जिला पंचायत अध्यक्ष श्रीमती जबिता मंडावी, पूर्व विधायक श्री बैदूराम कश्यप, पूर्व महापौर श्री किरण देव, कमिश्नर श्री दिलीप वासनीकर, पुलिस महानिरीक्षक श्री विवेकानंद सिन्हा, कलेक्टर श्री धनंजय देवांगन, पुलिस अधीक्षक श्री डी श्रवण, जिला पंचायत के मुख्य कार्यपालन अधिकारी श्री प्रभात मलिक संग जनप्रतिनिधिगण अउ बड़ संख्या म नागरिक उपस्थित रहिन।

मुहाचाही:  दृढ़ इच्छा शक्ति ले सबो चुनौती मन के सामना करे जा सकत हे: श्री केदार कश्यप