डॉ. रमन सिंह नरेन्द्र मोदी

अटलजी के विजन ल मोर मितान रमन सिंह जी आगू बढ़ावत हे: श्री नरेन्द्र मोदी

रायपुर, 14 जून 2018। प्रधानमंत्री श्री नरेन्द्र मोदी ह छत्तीसगढ़ म तेजी ले होवत विकास बर आज मुख्यमंत्री डॉ. रमन सिंह के तारीफ करत कहिन- जउन राज्य के निर्माण के पीछू तत्कालीन प्रधानमंत्री श्री अटल बिहारी वाजपेयी के विजन हे, राज्य के मनखे मन के कठोर परिश्रम हे, ओ राज्य ल तेज गति ले आगू बढ़त देखना एक सुखद अनुभव हे। श्री मोदी ह कहिन कि अटल जी के विजन ल मोर मितान रमन सिंह जी पूरा मेहनत के संग आगू बढ़ावत हे। हर पइत वो कोनो नवा कल्पना अऊ नवा योजना, नवा उत्साह अऊ उमंग के संग मोर तीर लेके आथें अऊ ओला लागू करके सफलता के शिखर तक पहुंचाथें। उमन डॉ. रमन सिंह ल यशस्वी अऊ लोकप्रिय मुख्यमंत्री बताइन। श्री मोदी ह बस्तर संभाग के मुख्यालय जगदलपुर ल आज घरेलू विमान सेवा ले जोड़े जाय के उल्लेख करत कहिन -कई बछर पहिली बस्तर के पहिचान सिरिफ बम, बंदूक अऊ पिस्तौल के नाम म होत रहिस, फेर आज जगदलपुर के पहिचान हवाई अड्डा ले घलोक होए लगे हे।
श्री मोदी ह कहिन -कहूं विकास करना हे, प्रगति करना हे, तो शांति अऊ कानून व्यवस्था घलोक बहुत जरूरी हे। डॉ. रमन सिंह ह एक तरफ शांति अऊ स्थिरता कायम करे म बल देहे हें, उन्‍हें दुसर तरफ उमन छत्तीसगढ़ ल आगू बढ़ाए बर नवा कल्पना मन के संग विकास यात्रा के घलोक आयोजन करे हें। श्री मोदी ह छत्तीसगढ़ म केन्द्र अऊ राज्य के कई ठन योजना मन अऊ उपलब्धि मन के मुअखरा उल्लेख करत कहिन कि- नवा छत्तीसगढ़ साल 2022 म नवा भारत के मार्ग प्रशस्त करही। उमन आमसभा म छत्तीसगढ़ के जनता के संग बरिसों जुन्ना संबंध ल सुरता करत कहिन -ये क्षेत्र मोर बर नवा नो हे। छत्तीसगढ़ जब मध्यप्रदेश के हिस्सा रहिस, तब मैं इहां टू-व्हीलर म घलोक आवत रहेंव। तब ले अब तक छत्तीसगढ़ ले मोर कोनो दूरी नइ हे। कहूं पाछू 25 बछर म एको साल अइसे नइ गीस, जब मोर इहां आना नइ होउ होवय। इहां के कोनो जिला अइसन नइ हे, जिहां मैं नइ गए होंवव। श्री मोदी ह आमसभा म मौजूद विशाल जनसमूह के माध्यम ले छत्तीसगढ़ के ढाई करोड़ जनता ल अपन शुभकामना दीन। उमन कहिन -आज ले दू महीना पहिली घलोक मैं छत्तीसगढ़ आए रहेंव, वो तको 14 तारीक रहिस अऊ आज घलोक 14 तारीक हे। मोला दुबारा इहां के जनता के आशीर्वाद मिले हे। हम आपमन ल बता देवन के श्री मोदी पाछू 14 अपरेल 2018 के दिन राज्य के बस्तर संभाग के ग्राम जांगला (जिला-बीजापुर) आए रहिन, जिहां उमन देश के 115 आकांक्षी जिला मन बर ग्राम स्वराज अभियान संग सम्पूर्ण राष्ट्र बर वन-धन योजना अऊ आयुष्मान भारत योजना के तहत पहिली चरण म हेल्थ एंड वेलनेस सेंटर के घलोक शुभारंभ करे रहिन।

मुहाचाही:  मुख्यमंत्री ल किसान संगवारी ह भेंट करिस पांच कटहल