डॉ. रमन सिंह

बाबा साहब ह कमजोर तबका मन ल देखाइन स्वाभिमान के संग आगू बढ़े के रद्दा: डॉ. रमन सिंह

मुख्यमंत्री ह भारत रत्न डॉ. भीमराव अंबेडकर के 127 वां जयंती म विनम्र श्रद्धांजलि अर्पित करिन

रायपुर, 14 अप्रैल 2018। मुख्यमंत्री डॉ. रमन सिंह ह आज भारत रत्न अऊ संविधान बनइया बाबा साहब डॉ. भीमराव अंबेडकर के 127 वां जयंती के अवसर म राजधानी रायपुर के घड़ी चौक स्थित उंखर प्रतिमा म माल्यार्पण करके ओ मन ल विनम्र श्रद्धांजलि अर्पित करिन। मुख्यमंत्री ह ए अवसर म कहिन कि बाबा साहब ह समाज के कमजोर तबका मन ल स्वाभिमान के संग आगू बढ़े के रद्दा देखाइन। उमन एक अइसे आदर्श समाज के सपना देखिन, जिहां जाति के अऊ ऊंच-नीच के भेदभाव झन होवय, सबो ल समान अवसर मिलय। हमर समाज प्रगतिशील समाज होवय। मुख्यमंत्री ह कहिन कि बाबा साहब ह संविधान के माध्यम ले समाज के कमजोर तबका ल अधिकार संपन्न बना के ओमां स्वाभिमान जगाइन अऊ आगू बढ़े के रद्दा देखाइन।
डॉ. भीम राव अंबेडकर सार्वजनिक जयंती समारोह समिति कोति आयोजित समारोह के अध्यक्षता विधानसभा अध्यक्ष श्री गौरीशंकर अग्रवाल ह करिन। नगर निगम रायपुर के महापौर श्री प्रमोद दुबे, छत्तीसगढ़ राज्य अल्पसंख्यक आयोग के अध्यक्ष श्री सुरेंद्र सिंह कैम्बो, सदस्य श्री तौकीर रजा, छत्तीसगढ़ राज्य पिछड़ा वर्ग आयोग के अध्यक्ष डॉ. सियाराम साहू, छत्तीसगढ़ राज्य अनुसूचित जनजाति आयोग के उपाध्यक्ष श्री विकास मरकाम, नगर निगम रायपुर के सभापति श्री प्रफुल्ल विश्वकर्मा, रायपुर विकास प्राधिकरण के अध्यक्ष श्री संजय श्रीवास्तव, पूर्व महापौर श्री सुनील सोनी, पूर्व पार्षद श्री सुनील बांदरे संग बहुत अकन जनप्रतिनिधि ए अवसर म उपस्थित रहिन। मुख्यमंत्री ह कहिन कि बाबा साहब युग पुरुष रहिन, उमन नागपुर के धर्म सभा म लाखों मनखे मन के आघू बुद्धम् शरणम गच्छामि के उदघोष करके मनखे मन ल भारतीय संस्कृति ले जोड़े रखे के निर्णय लीन। उंखर ये निर्णय युगों-युगों तक याद रखे जाही। उमन कहिन कि ये प्रसन्नता के बात हे कि बाबा साहब के आदर्श के अनुरुप समाज संगठित होके सबो क्षेत्र मन म आगू बढ़त हे।
विधानसभा अध्यक्ष श्री गौरीशंकर अग्रवाल ह बाबा साहब ल श्रद्धांजलि अर्पित करत कहिन कि डॉ. भीमराव अंबेडकर ह संविधान के माध्यम ले समाज के एकता ल बनाए रखे अऊ सामाजिक कुरीति मन ल खतम करे म महत्वपूर्ण योगदान दीन। उमन संविधान के प्रावधान के संग सामाजिक विषमता ल दूर करे अऊ समाज के आखरी मनखे तक विकास के रोशनी पहुंचाए के काम करिन। श्री अग्रवाल ह बाबा साहब के सपना ल पूरा करे बर सबो ले मिलके कर काम करे के आव्हान करिन।
मुख्यमंत्री ह समारोह म छत्तीसगढ़ के सुप्रसिद्ध लोक गायिका श्रीमती कविता वासनिक ल आयोजक मन कोति ले सम्मानित करिन। उमन छत्तीसगढ़ अल्पसंख्यक आयोग के वेब साइट के लोकार्पण तको करिन। ए वेवसाइट के संग अल्पसंख्यक समुदाय के मनखे मन ल आसानी ले प्रमाण पत्र मिल सकही। डॉ. सिंह ह ए अवसर म गीत मन के सी.डी. अऊ भारत रत्न डॉ. भीमराव अंबेडकर उपर प्रकाशित पुस्तक मन के विमोचन घलोक करिन। समारोह म श्री प्रबोध मिंज, संग बड़ संख्या म प्रबुद्ध नागरिक उपस्थित रहिन।

मुहाचाही:  मुख्यमंत्री के 24 मार्च के दिन के लोक सुराज अभियान के दौरा