डॉ. रमन सिंह

स्वच्छता बर मनखे मन के मानसिकता म बदलाव लाना बड़का काम : डॉ. रमन सिंह

  • स्वंय सेवी संस्था बंच आफ फूल्स के स्वच्छता कार्यक्रम म सामिल होइन मुख्यमंत्री
  • मुख्यमंत्री ह युवा मन ल प्रोत्साहित करे बर स्वेच्छा अनुदान मद ले एक लाख रूपिया देहे के करिन घोषणा

रायपुर 1 अप्रैल 2018। मुख्यमंत्री डॉ. रमन सिंह आज इहां रायपुर के कोटा रोड म स्वंय सेवी संस्था बंच आफ फूल्स के स्वच्छता कार्यक्रम म सामिल होइन। उमन कहिन कि स्वच्छता के खातिर मनखे मन के मानसिकता म बदलाव लाना एक बड़का काम ये। सकारात्मक सोच लेके ए संस्था के सदस्य पाछू साढ़े तीन साल ले जुटे हें, एखर से समाज के सबो वर्ग ल प्रेरणा मिलत हे। उमन कहिन कि संस्था के युवा स्वच्छता बर मनखे मन के मानसिकता म सकारात्मक बदलाव लाय म सफल होवत हे, ये एक बड़का उपलब्धि हे। कार्यक्रम म छत्तीसगढ़ राज्य औद्योगिक विकास निगम के अध्यक्ष श्री छगन मुंदड़ा नगर निगम रायपुर के महापौर श्री प्रमोद दुबे अऊ बंच आफ फूल्स के संयोजक श्री सचिन भुवालका संग संस्था के सदस्य उपस्थित रहिन।
बंच ऑफ फूल्स के टीम कोति ले रायपुर शहर के दू सौ भिथिया मन म पेंटिंग काम पूरा करे के अवसर म आयोजित ए कार्यक्रम म मुख्यमंत्री ह भिथिया मन के अवलोकन अउ पेंटिंग म हिस्सा लेके युवा मन के उत्साहवर्धन करिन। उमन संस्था के सदस्य मन ल स्वच्छता के शपथ घलोक देवाइन। ए अवसर म डॉ. सिंह ह संस्था ल स्वच्छता ले जुरे काम मन बर अपन स्वेच्छा अनुदान मद ले एक लाख रूपिया देहे के घोषणा करिन। कार्यक्रम म उमन महापौर श्री प्रमोद दुबे ले 50 हजार अऊ छत्तीसगढ़ राज्य औद्योगिक विकास निगम के अध्यक्ष श्री छगन मुंदड़ा ले युवा मन ल प्रोत्साहित करे बर 51 हजार रूपिया के राशि देहे के आग्रह घलोक करिन।




कार्यक्रम म मुख्यमंत्री डॉ. सिंह ह कहिन कि बंच आफ फूल्स के पूरा टीम स्वप्रेरणा ले रायपुर शहर के भिथिया मन के साफ-सफाई अउ पेंटिंग के संग स्वच्छता के संदेश देवत हे। एखर से कई शहर मन के युवा मन ल घलोक प्रेरणा मिले हे। उमन कहिन कि कवर्धा, जांजगीर -चांपा, कोरिया संग कई शहर मन म युवा मन ले मुलाकत होए हे जऊन स्वच्छता के प्रति मनखे मन ल जागृत करत हें। ये एक बड़का बदलाव ये। मुख्यमंत्री ह कहिन कि इतवार के दिन आन मनखे परिवार के संग समय बिताथें तब ये टीम शहर के दीवार मन के सफाई अऊ पेंटिंग म जुट जाथें। उमन कहिन कि रायपुर शहर ल स्वच्छ अऊ सुन्दर बनाए के संग संग ये टीम स्वच्छता के प्रति मनखे मन के मानसिकता म बदलाव लाय म महत्वपूर्ण भूमिका निभावत हे।
एखर अवसर म मुख्यमंत्री ह रायपुर शहर के दू सौ दीवाल मन ल स्वच्छ करके पेंटिंग करे म संस्था के सबो सदस्य मन ल अपन बधाई अऊ शुभकामना दीन अऊ आशा व्यक्त करिन के संस्था के सदस्य सरलग ए काम ल आगू जारी रखके दुसर संस्था मन ल प्रेरित करत रहिहीं। कार्यक्रम ल छत्तीसगढ़ राज्य औद्योगिक विकास निगम के अध्यक्ष श्री मुंदड़ा अऊ नगर निगम रायपुर के महापौर श्री दुबे ह घलोक सम्बोधित करिन।



मुहाचाही:  मुख्यमंत्री ह एक हजार ले जादा परिवार मन ल करिन आबादी पट्टा के वितरण