Lok Suraj अमर अग्रवाल

भारतीय संस्कृति म महिला मन के सबले बड़का योगदान – अमर अग्रवाल

रतनपुर म आयोजित कार्यक्रम म होइस महिला मन के सम्मान

बिलासपुर, 19 मार्च 2018। नगरीय प्रशासन उद्योग अउ वाणिज्यिक कर मंत्री श्री अमर अग्रवाल ह काल हाईस्कूल मैदान रतनपुर म आयोजित समारोह म कई ठन समाज के महिला मन अउ प्रतिभावान लइका मन ल सम्मानित करिन। ए अवसर म उमन 5 करोड़ के लागत ले सीसी रोड़ अउ नाली संग आन निर्माण कार्य मन के भूमि पूजन करिन। संगेच 10 लाख के लागत ले बस्तर आर्ट वाल पेंटिग के घलोक भूमि पूजन करिन।




नगरीय प्रशासन मंत्री श्री अग्रवाल ह ए अवसर म सम्बोधित करत कहिन कि भारतीय संस्कृति म महिला मन के योगदान अऊ सम्मान करे जात रहे हे। हमार देश म नवरात्रि शक्तिपूजन एकर सबले बड़े उदाहरन ये। उमन कहिन कि अभी हाले म महिला सशक्तिकरण अऊ बेटी बचाओ अऊ बेटी पढाओ योजनां के तहत ओ मन ल प्रोत्साहित करे जात हे। आज के बेटी मन घलोक कई ठन क्षेत्र मन म महत्वपूर्ण पद मन म काम करत हें। आज ओ मन विमान उड़ावत हें। सेना अऊ महिला पुलिस बल के रूप म हर क्षे़त्र म पुरूष मन के बराबर काम करत हें। उमन चैत्र नवरात्रि के शुभकामना देवत कहिन कि अब शासन ह नारी भ्रूण हत्या म घलोक कानून बनाके बेटी बचाओ कार्यक्रम के अन्तर्गत कड़ा कार्यवाही करत हे। सांसद श्री लखन लाल साहू ह अपन सम्बोधन म कहिन कि चैत्र नवरात्रि के अवसर म आयोजित महिला सम्मान समारोह ए बात के निसनी हे कि आज घलोक महिला मन के सम्मान होथे। ए अवसर म कोटा विधायक डॉ. रेणु जोगी पूर्व विधान सभा उपाध्यक्ष श्री नारायण चंदेल नगर पालिका अध्यक्ष सुश्री आशा सूर्यवंशी संग श्री शिव मोहन बघेल, जुगनू तंबोली, सुरेश सोनी अउ सी.एम.ओ., श्री होरी सिंह ठाकुर संग बड़ संख्या म रतनपुर के नागरिक मौजूद रहिन।



मुहाचाही:  ​मुख्यमंत्री पहुंचिस महानदी के उदगम स्थल