Lok Suraj

छत्तीसगढ़ म चलत हे देश के एकलौता लोक सुराज अभियान

  • मुख्यमंत्री ह अभी तक 25 जिला मन के करे हें दौरा
  • सात गांव मन म चौपाल शैली म त 19 गांव मन के समाधान शिविर मन म जनता ले करिन मुलाकात
  • अभी तक 9 जिला मुख्यालय मन म करिन 19 जिला मन के समीक्षा
  • 2005 म ग्राम सुराज के रूप म होइस शुरूआत
  • अब गांव-शहर मिलाके 2015 ले जारी हे लोक सुराज

रायपुर, 26 मार्च 2018। आम जनता के संग सीधा संवाद अउ योजना मन के सोशल आडिट खातिर भारत के एकलौता अउ अनोखा लोक सुराज अभियान छत्तीसगढ़ म प्रदेशवासी मन के सक्रिय भागीदारी ले उत्साह के संग चलत हे। ये बछर करीबन ढाई महीना पहिली शुरू होए राज्य सरकार के ये वार्षिक अभियान के तहत मुख्यमंत्री डॉ. रमन सिंह के प्रदेशव्यापी तूफानी दौरा आजो जारी रहिस। ये अभियान राज्य सरकार अउ जनता के बीच अपनापन ले भरे भावनात्मक नता के चिन्‍हारी बन गए हे, जिहां चौपाल अउ समाधान शिविर मन म जनता सरकार के नुमाइंदा मन ले खुलके बातचीत करत अपन दुःख दर्द बतावत हें अउ उमन ल राहत घलव मिलत हे।
आप मन जानतेच होहू के अभियान के ये तीसर चरण हे। येमा मुख्यमंत्री ले लेके जमो मंत्री अउ मुख्य सचिव ले लेके जम्‍मो संभागीय कमिश्नर, जिला कलेक्टर अउ शासन के जम्‍मो विभाग मन के मैदानी अधिकारी अउ कर्मचारी गांव मन के दौरा करत हें। समाधान शिविर मन म लोगन मन ल योजना मन के लाभ पहुंचावत हें। डॉ. रमन सिंह के नेतृत्व म लोक सुराज अभियान के पहिली अध्याय ग्राम सुराज अभियान के रूप म वर्ष 2005 म शुरू होए रहिस। करीबन सात बछर बाद उमन एमा नगर सुराज अभियान ल धलव जोरिस। एकर बाद 2015 ले ग्राम अउ नगर दूनों ल मिलाके उंकर नेतृत्व म लोक सुराज अभियान के शुरूआत होइस। डॉ. सिंह ह ये पइत घलव लोक सुराज अभियान म हेलीकॉप्टर ले जिला मन के आकस्मिक दौरा के शुरूआत राज्य के नक्सल हिंसा पीड़ित बस्तर संभाग के जिला मन से करिन। उमन पहिली दिन 11 मार्च के दिन कांकेर जिला के ग्राम बण्डाटोला म आकस्मिक रूप ले पहुंचके चौपाल लगाईन अउ उही दिन मद्देड़ (जिला बीजापुर) अउ इंजरम (जिला सुकमा) के समाधान शिविर मन म भी शामिल होइन।




मुख्यमंत्री ह लोक सुराज के सोलहवां दिन आज बेमेतरा, बालोद, धमतरी अउ कांकेर जिला मन के सघन दौरा करिन। येला मिलाके डॉ. सिंह ह पाछू करीबन एक पाख ले चलत तीसर चरण के अभियान म अब तक बस्तर ले लेके सरगुजा तक राज्य के 27 म ले 25 जिला मन के दौरा कर डरे हें। उमन आज बेमेतरा जिला के ग्राम तेन्दूभाठा, जिला बलोद के ग्राम भण्डेरा अउ जिला धमतरी के ग्राम जोरातराई के समाधान शिविर मन म अचानक पहुंचके जनता ले मुलाकात करिन। ये बीच उमन कई ठन जिला मन म कहूं स्कूल अउ छात्रावास म पहुंचके लइका मन से बातचीत करिन, त कहूं वो प्रधानमंत्री आवास योजना के तहत पक्का मकान म रहे ल आ गए ग्रामीण मन से मिले उंखर घर पहुंच गीन। कहूं पेड़ के डगाल म खेलत नान्हें लइका मल ले हाथ मिलाइन, त कहूं चौपाल मन म उमन ले पहाड़ा अउ कविता सुनके उंखर उत्साह बढ़ाइन। समाधान शिविर मन म हितग्राहीमूलक योजना मन के तहत जरूरतमंद लोगन ल सामग्री आदि के वितरण घलव करिन।




अब तक 19 जिला मन के समाधान शिविर मन म शामिल होइन मुख्यमंत्री
डॉ. रमन सिंह ये शिविर मन ल मिलाके अब तक 19 जिला मन के समाधान शिविर मन म शामिल हो चुके हें। उमन ये पइत के अभियान म सात गांव मन म आकस्मिक रूप ले पहुंचके कहूं पेड़ के छांव म, त कहूं तालाब के पार म चौपाल शैली म ग्रामीण मन से मुलाकात करिन, त 19 समाधान शिविर मन म घलव अचानक पहुंचिन। अभियान के तहत मुख्यमंत्री जेन आकस्मिक चौपाल मन म शामिल होइन वोमा बंडाटोला (जिला कांकेर), सेमहरा (जिला गरियाबंद ), मेरो (जिला कोरिया ), डोंगरडुला (जिला धमतरी), पुसापाल (जिला कोण्डागांव), टुरीझर (महासमुंद) अउ सिंघारी (जिला-कबीरधाम) सामिल हे।
इही कड़ी म डॉ. सिंह ह जेन समाधान शिविर मन म अचानक अपन उपस्थिति दीन, वोमा मददेड़ (जिला बीजापुर), इंजरम (जिला सुकमा), भटगांव (जिला मुंगेली), खरकट्टा (जिला जशपुर), नगरा (जिला बलरामपुर), भैसामुड़ा (जिला कोरबा), लुतराशरीफ (जिला बिलासपुर), माड़ागांव (जिला गरियाबंद), थनौद (जिला दुर्ग), धौड़ाई (जिला-नारायणपुर) किरंदुल (जिला दंतेवाड़ा), कोसमकुंडा (बलौदाबाजार), ससौली (जिला-सरगुजा), अमोरा (जिला जांजगीर-चांपा), पुसल्दा (जिला-रायगढ़), बैजनाथपुर (जिला-सूरजपुर), तेंदूभांठा (जिला-बेमेतरा), भण्डेरा (जिला-बालोद) अउ जोरातराई (जिला-धमतरी) शामिल हें।




प्रदेश के 9 जिला मुख्यालय मन म मुख्यमंत्री ह करिन 19 जिला मन के समीक्षा
मुख्यमंत्री ये अभियान के तहत कई ठन जिला मुख्यालय मन म अधिकारी मन के बैठक लेके विकास कार्य अउ योजना मन के समीक्षा भी करत हें। उमन अब तक 09 जिला मुख्यालय मन म 19 जिला मन के संयुक्त समीक्षा बैठक ले डरे हें। उमन जिला मुख्यालय दंतेवाड़ा म बीजापुर, सुकमा अउ दंतेवाड़ा के समीक्षा करिन। एकर बाद जिला मुख्यालय बिलासपुर म मुंगेली अउ बिलासपुर जिला मन के अउ जिला मुख्यालय अम्बिकापुर म सरगुजा अउ बलरामपुर जिला मन के समीक्षा उमन करिन। डॉ. रमन सिंह ह जिला मुख्यालय जांजगीर म कोरबा अउ जांजगीर-चांपा जिला मन के संघरा समीक्षा बैठक लीन। राजनांदगांव म उमन कबीरधाम अउ राजनांदगाव जिला मन के समीक्षा करिन। डॉ. सिंह ह जिला मुख्यालय जगदलपुर म नारायणपुर अउ बस्तर जिला मन के अउ जिला मुख्यालय जशपुर म रायगढ़ अउ जशपुर जिला मन के समीक्षा करिन। मुख्यमंत्री के अध्यक्षता म कोरिया जिला के मुख्यालय बैकुण्ठपुर म सूरजपुर अउ कोरिया जिला मन के संघरा समीक्षा बैठक होइस। आज 26 मार्च के दिन उमन जिला मुख्यालय कांकेर म कोण्डागांव अउ कांकेर जिला मन के समीक्षा करिन।
आप मन जानतेच होहू के डॉ. रमन सिंह के नेतृत्व म ए बछर के लोक सुराज अभियान 12 जनवरी ले शुरू होए हे, जे तीन चरण मन म 31 मार्च तक चलत हे। पहली चरण म 12 जनवरी ले 14 जनवरी तक ग्राम पंचायत अउ शहरी क्षेत्र मन म शिविर लगाके जनता ले आवेदन सकेले गीस। दूसर चरण म 15 जनवरी से 11 मार्च तक वोकर निराकरण करे गीस अउ तीसर चरण म 11 मार्च ले 31 मार्च के बीच ग्राम समूह अउ शहरी क्षेत्र मन म वार्ड समूह मन के बीच समाधान शिविर लगाके लोगन मन के आवेदन मन के निराकरण के स्थिति के बारे म बताए जात हे। हितग्राही मूलक योजना मन म चेक अउ अनुदान सामग्री के घलव वितरण करे जात हे। छत्तीसगढ़ देश के पहिली अउ इकलौता राज्य ये, जिहां मुख्यमंत्री के नेतृत्व म शासन अउ प्रशासन के पदाधिकारी अउ प्रतिनिधि हर साल करीबन ढाई महीना ले तीन महीना के समयबद्ध अभियान चलाके जनता के बीच पहुंचथें अउ लोगन के दुःख दर्द सुनके उमन ल सरकार के कई ठन योजना मन के जरिए राहत देवाए के घलव उदीम करथें। एकरे संग योजना मन के क्रियान्वयन के जमीनी स्थिति के घलव आंकलन आम जनता के बीच बइठके करे जाथे।



मुहाचाही:  रमन कका ले पाके खेलौना, खुस होइन लइका