Yojana

पहली पइत देखिन बड़का क्रिकेट स्टेडियम : रायगढ़, मुंगेली, बिलासपुर अऊ महासमुंद के 500 पंच-सरपंच

रायपुर, 03 अप्रैल 2018। हमर छत्तीसगढ़ योजना के तहत दू दिन के अध्ययन यात्रा म राजधानी रायपुर आए रायगढ़, मुंगेली, बिलासपुर अऊ महासमुंद जिला के कई पंचायत मन के प्रतिनिधि मन ह नया रायपुर के शहीद वीर नारायण सिंह अंतर्राष्ट्रीय क्रिकेट स्टेडियम देखिन। चारों जिला मन ले करीबन 500 पंच-सरपंच अध्ययन प्रवास म रायपुर आए हें। एमां ले जादातर पंच-सरपंच पहली पइत नया रायपुर आए हें। इहां के भव्य स्टेडियम देखके ओ मन अड़बड़ खुश अऊ रोमांचित होइन। जऊन स्टेडियम ल ओ मन अब तक टेलीविजन अऊ फोटू म देखत आए रहिन, ओला प्रत्यक्ष देखना ऊंखर बर अनूठा अनुभव रहिस।



दू दिन के अध्ययन प्रवास के बेरा पंचायत प्रतिनिधि मन ह रायपुर अऊ नया रायपुर के बहुत अकन जघा मन के भ्रमण करिन। एमां छत्तीसगढ़ विधानसभा, इंदिरा गांधी कृषि विश्वविद्यालय, मंत्रालय, जंगल सफारी, पुरखौती मुक्तांगन अऊ चंपारण सामिल हे। पंच-सरपंच हमर छत्तीसगढ़ योजना के आवासीय परिसर, नया रायपुर के उपरवारा स्थित होटल प्रबंधन संस्थान म जनसंपर्क विभाग कोति ले लगाए गए विशाल छायाचित्र प्रदर्शनी के संग छत्तीसगढ़ म पाछू डेढ़ दशक म होए विकास, सरकार के प्रमुख योजना अउ प्रदेश के उपलब्धि मन ले रू-ब-रू होइन।
पंचायत प्रतिनिधि मन ह पुरखौती मुक्तांगन म लाइट एंड साउंड शो के माध्यम ले छत्तीसगढ़ के इतिहास, पुरातत्व, संस्कृति अऊ राज्य के विकास के सफर के झलकी तको देखिन। ओ मन ल कृषि विश्वविद्यालय म खेती के आधुनिक तकनीक मन संग मृदा स्वास्थ्य, संकर बीज, फल अउ फूल के खेती अउ पशुपालन के बारे म जानकारी दे गइस।


मुहाचाही:  पंचायत प्रतिनिधि मन ह महानदी भवन के भ्रमण करके जानिन मंत्रालय के काम-काज