Games केदार कश्यप रायपुर

श्री केदार कश्यप ह राष्ट्रीय शालेय क्रीडा प्रतियोगिता म पदक पाये खिलाड़ी मन ल करिस सम्मानित

रायपुर, 02 जुलाई 2018। स्कूल शिक्षा मंत्री श्री केदार कश्यप ह आज इहां 62वीं राष्ट्रीय शालेय क्रीडा प्रतियोगिता साल 2016-17 म पदक पवइया राज्य के 633 खिलाड़ी मन ल सम्मानित करिस। सम्मान समारोह रविन्द्र मंच, कालीबाड़ी म आयोजित करे गीस। श्री कश्यप ह सबो पदक प्राप्त खिलाड़ी मन, ऊंखर पालक मन अउ गुरूजी मन ल अपन बधाई अउ शुभकामना दीन। श्री कश्यप ह बताइस कि एस.जी.एफ आई. कोति ले तैयार करे गए ग्रेडेशन सूची म पूरा देश म पाछू साल छत्तीसगढ़ ल 11वां स्थान मिले रहिस, जऊन साल 2017-18 म पांचवा स्थान म पहुंच गीस, जऊन हमार राज्य बर गौरव के बात हे। इही सिलसिला म आगामी बछर म पूरा देश म पहिली स्थान म पहुंचना हे।




उमन कहिन कि हमार प्रदेश म खेल प्रतिभा मन के कोनो कमी नइ हे। प्रदेश सरकार घलोक शिक्षा अउ खेल के बेहतर माहौल देवाए म लगातार प्रयासरत हे। पहिली प्रदेश म सिरिफ 7 खेल जोन रहत रहिस, जऊन ल अभी हाले म प्रदेश के 27 जिला मन ल 12 खेल जोन म बांटे गए हे, जेमां लगभग 40 हजार खिलाड़ी मन ल कई ठन खेल प्रतियोगिता मन म हिस्सा लेहे के अवसर प्राप्त होवत हे। श्री कश्यप ह बताइस कि प्रति साल राष्ट्रीय शालेय क्रीडा प्रतियोगिता म स्वर्ण पदक, रजक पदक अउ कांस्य पदक प्राप्त करइया खिलाड़ी मन ल 21 हजार, 15 हजार अउ 10 हजार के रेखांकित चेक के संग एक-एक ब्लेजर घलोक प्रदान करे जात हे अउ राज्य, राष्ट्रीय अउ अंतर्राष्ट्रीय स्तर म पदक प्राप्त करइया खिलाड़ी मन ल 10, 15 अउर 20 अंक के बोनस घलोक प्रदाय करे जात हे।
श्री कश्यप ह खिलाड़ी मन के यात्रा भत्ता राशि 150 रूपिया ले बढ़ाके 180 रूपिया करे के घोषणा घलोक करिन। लोक शिक्षण संचालनालय कोति ले आयोजित ए कार्यक्रम म स्वर्ण पदक प्राप्त 261, रजत पदक प्राप्त 167 अउ कांस्य प्रदक प्राप्त 205 संग कुल 633 खिलाड़ी मन ल सम्मानित करे गीस। स्वर्ण पदक प्राप्त 261 खिलाड़ी मन ल 21 हजार के मान ले 54 लाख 81 हजार, रजत पदक प्राप्त खिलाड़ी मन ल 15 हजार के मान ले 25 लाख पांच हजार अउ कांस्य पदक प्राप्त 205 खिलाड़ी मन ल 10,000 रूपिया के मान ले 20 लाख 50 हजार के राशि के डिमांड ड्राफ्ट वितरित करे गीस। श्री कश्यप ह बताइस कि शाला क्रीडा प्रतियोगिता साल 2016-17 म 330 बालक अउ 303 बालिका मन ल सम्मानित करे गीस। ए अवसर म संसदीय सचिव श्री अंबेश जांगड़े, लोक शिक्षण संचालक श्री एस. प्रकाश, जिला शिक्षा अधिकारी रायपुर श्री एन.एन. बंजारा संग राज्य के सबो जिला मन ले आए खिलाड़ी, ऊंखर पालकगण अउ बड़ संख्या म छात्र-छात्रा मन उपस्थित रहिन।



मुहाचाही:  मुख्यमंत्री लीस शहरी प्रशासन विभाग के समीक्षा बैठक