Lok Suraj डॉ. रमन सिंह

मुख्यमंत्री ह पीएससी परीक्षा के तइयारी म जुटे युवा मन ल दीन शुभकामना

अपन दस्‍कत करके दीन शुभकामना पत्र

रायपुर, 01 अप्रैल 2018। मुख्यमंत्री डॉ. रमन सिंह ह काल जिला मुख्यालय राजनांदगांव म लोक सेवा आयोग के प्रतियोगी परीक्षा मन के तइयारी करत युवा मन से मुलाकात करके ओ मन ल अपन दस्‍कत करके शुभकामना पत्र सउंपिन। डॉ. सिंह ह पत्र म स्‍वामी विवेकानंद कोति ले युवा मन ल देहे गए प्रेरक संदेश उत्तिष्ठत, जागृत, प्राप्य, वरान्निबोधत लिखे हें, जेखर मतलब हे -उठव, जागव अऊ तब तक मत रूकव जब तक तुहंर शुभ संकल्प पूरा न हो जाय। मुख्यमंत्री ह ए अवसर म युवा मन ल अपन संक्षिप्त उद्बोधन घलोक दीन। उमन कहिन कि कोनो लंबा सफर के शुरूआत एक छोटे से कदम ले होथे अऊ आप मन आज उज्ज्वल भविष्य के दिशा म अपन कदम बढ़ा देहे हव। उमन कहिन कि आप मन बेहतर तैयारी करव। ए बात बर शासन कोति ले विशेष रूप ले कोचिंग के व्यवस्था करे गए हे। संस्कारधानी म प्रतियोगी परीक्षा मन बर बेहतर वातावरण तैयार होवय, ए खातिर डीएमएफ कोति ले एकेडमिक परिसर के निर्माण घलोक करे जात हे। ए परिसर म हायर सेकेंडरी के परीक्षा के बाद अउ स्नातक स्तर के बाद होवइया परीक्षा मन के कोचिंग के सुविधा होही। सर्वसुविधायुक्त लाइब्रेरी होही अऊ इंटरनेट के सुविधा घलोक होही।




ये एकेडमिक परिसर नगर के महाविद्यालय मन के तीर होही, एखर से पढ़इया अऊ प्रतियोगी परीक्षा मन के तइयारी के बेहतरीन माहौल तैयार होही। उमन कहिन कि आप मन आज पीएससी के तैयारी के संकल्प लेहे हव आप मन के संकल्प ल पूरा करे बर हर संभव सहायता दे बर शासन प्रतिबद्ध हे। उमन कहिन कि आप मन सिविल सेवा म चुने जाहू, प्रशासन म आए के बाद आप मन के आत्मविश्वास अऊ निखरही। प्रशासनिक सेवा मन के माध्यम ले आप मन जनसरोकार मन ले पूरा जुड़ सकत हव।
ए मौका म कलेक्टर श्री भीम सिंह ह 12.95 करोड़ रुपिया के लागत ले बनइया एकेडमिक परिसर के विस्तृत जानकारी दीन। इहां लाईब्रेरी अऊ छात्र-छात्रा मन बर पचास सीटर हॉस्टल के सुविधा घलोक बनाए जाही। लोकसभा सांसद श्री अभिषेक सिंह, पूर्व विधानसभा अध्यक्ष श्री धरमलाल कौशिक अउ आन अतिथि मन ह घलोक युवा मन ल शुभकामना दीन। ए मौका म कोचिंग बर आये युवा मन ल पीएससी के नवा सिलेबस के मुताबिक तैयार करे गए कोर्स मटेरियल घलोक सौंपे गीस।



मुहाचाही:  मुख्यमंत्री ह करिस जू-डायवर्सिटी पुस्तक के विमोचन