डॉ. रमन सिंह रायपुर

छत्तीसगढ़ पूंजी निवेश बर देश के सबले बेहतर राज्य: डॉ. रमन सिंह

  • मुख्यमंत्री ह नवा रायपुर म करिन ’कनवेंशन सेंटर’ के लोकार्पण
  • डॉ. सिंह ह उद्योगपति मन के सम्मेलन ’थिंक प्रोग्रेस, थिंक छत्तीसगढ़’ ल संबोधित करिन

रायपुर, 17 जुलाई 2018। मुख्यमंत्री डॉ. रमन सिंह ह आज कहिन के उद्योगों म पूंजी निवेश बर छत्तीसगढ़ देश के सबले बेहतर राज्य हे। सामाजिक क्षेत्र म देश म सबले बड़े निवेश करइया छत्तीसगढ़, राज्य के विकास बर अकतहा संसाधन जुटाके अऊ बेहतर वित्तीय प्रबंधन के संग विकास के रद्दा म तेजी ले आगू बढ़त हे। मुख्यमंत्री आज नया रायपुर स्थित डॉ. श्यामा प्रसाद मुखर्जी उद्योग अउ व्यापार परिसर म नवनिर्मित ’कनवेंशन सेंटर’ के उदघाटन करे के बाद उद्योगपति मन के संग गोठ बर आयोजित सत्र ’थिंक प्रोग्रेस, थिंक छत्तीसगढ़’ ल संबोधित करत रहिन। डॉ. सिंह ह ए अवसर म उपस्थित उद्योगपति मन अऊ कई ठन उद्योग मन के प्रतिनिधि मन ल संबोधित करत कहिन कि छत्तीसगढ़ म उद्योग अऊ व्यापार के उज्जवल संभावना मन ले जुरे के ये एक बेहतर अवसर हे। राज्य सरकार ह, राज्य के विकास म उद्योग मन के भागीदारी बढ़ाए बर हर संभव प्रयास करत हे। राज्य के सरकार के प्राथमिकता आई.टी., इलेक्ट्रिानिक्स, खाद्य प्रसंस्करण अऊ सोलर एनर्जी जइसे- प्रदूषण रहित उद्योग मन ल बढ़ावा देहे के हे।
वाणिज्य अऊ उद्योग मंत्री श्री अमर अग्रवाल, लोक निर्माण मंत्री श्री राजेश मूणत, छत्तीसगढ़ राज्य औद्योगिक विकास निगम के अध्यक्ष श्री छगन मुंदड़ा, मुख्य सचिव श्री अजय सिंह, मुख्यमंत्री के प्रमुख सचिव श्री अमन कुमार सिंह, उद्योग अउ वाणिज्य विभाग के सचिव डॉ. कमलप्रीत सिंह घलोक ए अवसर म उपस्थित रहिन। मुख्यमंत्री ह जऊन कनवेंशन सेंटर के उदघाटन करिन, ओखर निर्माण प्रदेश सरकार के वाणिज्य अऊ उद्योग विभाग के उपक्रम छत्तीसगढ़ राज्य औद्योगिक विकास निगम कोति ले नया रायपुर म करीबन 25 करोड़ रूपिया के लागत ले करे गए हे। नवनिर्मित ए केन्द्र म 750 सीट के अत्याधुनिक ऑडिटोरियम, पांच सेमिनार हॉल संग करीबन 20 हजार वर्गफीट म नवनिर्मित प्रदर्शनी हॉल घलोक सामिल हे। मुख्यमंत्री ह ए अवसर म आयोजित व्यापार अउ उद्योग प्रदर्शनी के कई ठन स्टॉल मन के अवलोकन करिन। उमन ए अवसर म प्रकाशित कॉफी टेबल बुक ’एडवॉन्टेज छत्तीसगढ़’ के घलोक विमोचन करिन।
मुख्यमंत्री ह ए अवसर म कहिन कि दू प्रतिशत के जनसंख्या वाले छत्तीसगढ़ राज्य के देश के स्टील, सीमेंट, पॉवर, एल्युमिनियम जइसन कोर सेक्टर के उद्योग मन म 20 प्रतिशत के भागीदारी हे। छत्तीसगढ़ म उद्योग अऊ व्यापार के फले-फूले के अच्छा संभावना हवय। देश के करीबन केन्द्र म स्थित छत्तीसगढ़ म राजनीतिक स्थिरता, प्राकृतिक संसाधन मन के संगें-संग कुशल मानव संसाधन, बेहतर रोड, रेल अऊ एयर कनेक्टिविटी, गुणवत्ता पूर्ण बिजली के उपलब्धता अऊ राज्य सरकार के उद्योग हितैषी नीति मन के सेती उद्योग मन बर इहां बेहतर अवसर हे।
मुख्यमंत्री ह राज्य के बेहतर आर्थिक स्थिति के जानकारी देवत कहिन के पाछू 18 बछर म प्रदेश के सकल घरेलू उत्पाद 30 हजार करोड़ रूपिया ले बढ़के दू लाख 90 हजार करोड़ रूपिया हो गए हे। राज्य सरकार के बजट ए अवधि म नौ हजार करोड़ रूपिया ले बढ़के 92 हजार करोड़ रूपिया हो गए हे। छत्तीसगढ़ जल्दीच देश के एक लाख करोड़ के बजट वाले राज्य मन के क्लब म सामिल होवइया हे। ए अवधि म राज्य म प्रति मनखे आय दस हजार रूपिया ले बढ़के 92 हजार रूपिया हो गए हे। छत्तीसगढ़ म तेरा साल राजस्व आधिक्य के स्थिति रहीस। भारतीय रिजर्व बैंक ह छत्तीसगढ़ ल सबले बेहतर वित्तीय प्रबंधन वाला राज्य बताए हे। देश म सबले कम कर्ज छत्तीसगढ़ ह लेहे हे। मुख्यमंत्री ह राज्य के विकास बर अकतहा आर्थिक संसाधन जुटाए के उदीम मन के उल्लेख करत कहिन कि प्रदेश म रेल नेटवर्क के विकास बर राज्य सरकार ह 600 करोड़ के एन्यूटी म सार्वजनिक निजी भागीदारी (पी.पी.पी.मॉडल) के भागीदारी ले अकतहा संसाधन जुटाए हे। ए मॉडल म प्रदेश म करीबन 13 हजार करोड़ रूपिया लागत के रेल नेटवर्क विस्तार के काम चलत हे।
डॉ. सिंह ह बताइन कि प्रदेश म बिजली के उत्पादन चार हजार मेगावाट ले बढ़के करीबन 23 हजार मेगावाट हो गए हे। इक्कीसवीं सदी के पहली राजधानी नया रायपुर म स्मार्ट सिटी के रूप म विकसित होवत हे। नवा रायपुर म करीबन दस हजार करोड़ रूपिया के पूंजी निवेश होय हे। उमन बताइन के अवइया चार महिना म बस्तर के नगरनार म निर्माणाधीन तीन मिलियन टन क्षमता वाले इस्पात संयंत्र म उत्पादन शुरू हो जाही। उमन कहिन कि देश के पहली अऊ दक्षिण अफ्रीका के बाद दुनिया के दूसर कौशल उन्नयन कानून छत्तीसगढ़ ह बनाय हे। अब तक करीबन चार लाख युवा मन ल कौशल उन्नयन के प्रशिक्षण देहे जा चुके हे। राज्य सरकार कौशल विकास कार्यक्रम म हर साल 160 करोड़ रूपिया के पूंजी निवेश करत हे। ए सेक्टर म देश म 12 प्रतिशत हिस्सा छत्तीसगढ़ के हे। प्रदेश के सबो ग्राम पंचायत मन ल ऑप्टिकल नेटवर्क ले जोड़के इंटरनेट कनेक्टिविटी देहे जात हे। सूचना क्रांति योजना (स्काई) के अंतर्गत प्रदेश म 50 लाख स्मार्ट फोन निःशुल्क वितरित करे जाही।
वाणिज्य अउ उद्योग मंत्री श्री अमर अग्रवाल ह बताइस कि छत्तीसगढ़ के आर्थिक अऊ औद्योगिक प्रगति राज्य सरकार के सबले बड़े प्राथमिकता हे। छत्तीसगढ़ औद्योगिक शांति के जीता-जागता उदाहरण हे। प्रदेश म उद्योग मन के स्थापना बर लगभग तीन लाख करोड़ के एमओयू करे गए हे जेमा ले 30 ले 32 प्रतिशत उद्योग मन म उत्पादन शुरू हो गए हे। मुख्य सचिव श्री अजय सिंह ह कहिन कि राज्य सरकार के औद्योगिक नीति, आई.टी. नीति अऊ लॉजिस्टिक नीति उद्योग हितैषी हे। उमन उम्मीद जताइन के ये आयोजन प्रदेश म पूंजी निवेश ल बढ़ावा देहे म बिक्‍कट उपयोगी होही। शंघाई म भारत के काउंसलेट जनरल श्री अनिल कुमार राय, भारतीय उद्योग परिसंघ (सीआईआई) छत्तीसगढ़ चेप्टर के अध्यक्ष श्री पंकज सारडा, रविन ग्रुप के अध्यक्ष सह प्रबंध निदेशक श्री विजय अऊ फ्रेट बाजार के सह संस्थापक श्री गणेश रेवनवार ह घलोक अपन विचार प्रकट करिन। टाईम्स ग्रुप के चीफ एडिटर श्री मिहीर भट्ट ह स्वागत भाषण दीन। उमन कहिन कि नवा रायपुर के ये वाले ट्रेड अऊ कनवेंशन सेंटर देश के सर्वश्रेष्ठ कनवेंशन सेंटर मन म एक हे। ए अवसर म सारडा ग्रुप के अध्यक्ष सह प्रबंध निदेशक श्री कमल सारडा, हीरा ग्रुप के महाप्रबंधक श्री बजरंग लाल अग्रवाल संग वाणिज्य अउर उद्योग विभाग के संचालक श्रीमती अलरमेलमंगई डी. संग बहुत अकन उद्योगपति उपस्थित रहिन।

मुहाचाही:  मुख्यमंत्री ह करिस कार्टून छत्तीसी पत्रिका के विमोचन