prashasan अजय सिंह

आर्थिक अऊ सामाजिक चुनौती मन के बीच सिविल सेवा के अधिकारी मन ल सुघ्‍घर प्रदर्शन के जरूरत : मुख्य सचिव

सिविल सेवा के अधिकारी मन म आत्मविश्वास जरूरी: श्री एस.के. मिश्रा

रायपुर, 21 अप्रैल 2018। सिविल सेवा दिवस के अवसर म आज सिविल सेवा के अधिकारी मन के रायपुर के नवीन थिरावन गृह म एक कार्यक्रम के आयोजन करिस। ए कार्यक्रम म सिविल सेवा के कार्य म अऊ चुनौती मन के बारे म विस्तार ले चर्चा करे गइस। कार्यक्रम म प्रधानमंत्री श्री नरेन्द्र मोदी कोति ले सिविल सेवा अधिकारी मन बर संबोधन के सीधा प्रसारण करिस।
मुख्य सचिव श्री अजय सिंह ह कार्यक्रम के शुभारंभ अवसर म कहिन कि साल 2006 ले सरलग सिविल सेवा दिवस मनाए जात हे। उमन कहिन कि सिविल सेवा के अधिकारी मन के अच्छा परफारमेंस के बदौलत छत्तीसगढ़ म खाद्य सुरक्षा, सार्वजनिक वितरण प्रणाली, हेल्थ स्कीम (मितानिन), प्रधानमंत्री आवास योजना, कौशल उन्नयन, सॉलिड वेस्ट मैनेजमेंट के अम्बिकापुर मॉडल आदि बहुत अकन गुणवत्तापूर्ण काम होए हे, जेखर सेती देश म छत्तीसगढ़ के अलग पहिचान बने हे। उमन कहिन कि अभी हाले समय म सामाजिक अऊ आर्थिक व्यवस्था म बहुत अकन बदलाव अऊ चुनौती आए हे। हमला ए चुनौती मन के सामना करत बेहतरीन प्रदर्शन करना होही।



पूर्व मुख्य सचिव श्री एस.के. मिश्रा ह अपन संबोधन म कहिन कि सिविल सेवक मन ल बहुआयामी काम करे ल होथे। वैश्वीकरण, उदारीकरण अऊ निजीकरण के दौर के बाद सिविल सेवक मन के कार्य प्रणाली म व्यापक बदलाव आए हे। उमन अपन कार्यकाल के कई अनुभव बताइन अऊ कहिन कि सिविल सेवक मन के नैतिक व्यवहार का होना चाही। सिविल सेवक मन म कोनो काम ल करे बर आत्मविश्वास होना जरूरी हे। काम के सफलतापूर्वक निर्वहन बर कोनो चुनौती आए म अपन आत्मविश्वास म कमी नइ आन देना चाही।
पूर्व पुलिस महानिदेशक श्री राजीव माथुर ह सिविल सेवक मन ल अपन संबोधन म कहिन कि आप मन देश के सर्वश्रेष्ठ मस्तिष्क हे। हमेशा मानवीय भावना मन ल समझत अपन काम मन के निर्वहन करव। उमन कहिन कि कोनो जिला म बेहतर काम करे बर कलेक्टर, पुलिस अधीक्षक अऊ जिला न्यायाधीश के बीच बेहतर तालमेल होना जरूरी हे। जब ए तीनों म सामंजस्य होथे, त हर काम आसान हो जाथे। पूर्व प्रधान मुख्य वन संरक्षक श्री ए.के. सिंह ह कहिन कि आज सिविल सेवक मन ल संग म लेके कई ठन प्रकार के काम सम्पादित करे जात हे, जेमां ऊंखर वर्कलोड म काफी बढ़ोत्तरी घलोक होए हे। उमन कहिन कि एक अच्छा राष्ट्र के निर्माण म सबो सिविल सेवक अपन विशिष्ठ योगदान देवत हें।
एखर अवसर म प्रधानमंत्री श्री नरेन्द्र मोदी कोति ले नई दिल्ली के विज्ञान भवन म आयोजित सिविल सेवा दिवस म सिविल सेवा के अधिकारी मन ल संबोधित करिस। प्रधानमंत्री के संबोधन ल सिविल लाइन स्थित न्यू सर्किट हाऊस म सीधा प्रसारण कराए गीस। सबो अधिकारी मन ह प्रधानमंत्री के संबोधन ल सुनिन। ए अवसर म भारतीय प्रशासनिक सेवा, भारतीय पुलिस सेवा, भारतीय वन सेवा, भारतीय रेलवे अउ पोस्टल सेवा संग कई ठन सिविल सेवा मन के अधिकारी उपस्थित रहिन।


मुहाचाही:  पढ़ईया लइका मन बर जरूरी सूचना