Lok Suraj डॉ. रमन सिंह

मुख्यमंत्री के अचानक धमतरी जिला के ग्राम डोंगरडुला पहंचे म गांव वाले मन ल मिलीस सौगात

रायपुर, 17 मार्च 2018। मुख्यमंत्री डॉ .रमन सिंह प्रदेशव्यापी लोक सुराज अभियान के तहत आज अचानक धमतरी जिला के गांव डोंगरडुला (विकासखण्ड-नगरी) पहुंचिन। उहां देखते देखत गांव वाले मन के भीड़ उमड़ परिस। उमन गांव म साल के पेड़ के तरी गांव वाले मन के चौपाल लगाइन अऊ उंखर से चर्चा करके प्रधानमंत्री गृह योजना, प्रधानमंत्री उज्ज्वला योजना, तेंदूपत्ता बोनस वितरण, शौचालय निर्माण, राशन वितरण अउ पेयजल व्यवस्था के जानकारी लीन। डॉ. सिंह ह तेंदूपत्ता संग्राहक मन ल 8 दिन के भीतर चरणपादुका वितरित कराए के निर्देश अधिकारी मन ल दीन।




मुख्यमंत्री डॉ. सिंह ह गांव वाले मन के मांग म ग्राम डोंगरडुला म एक नवा आंगनबाड़ी भवन अऊ बेहड़ापारा म प्राथमिक शाला भवन ल तुरंते मंजूरी प्रदान करिन। संगेच गांव म निस्तारी व्यवस्था बर तीन तालाब मन के गहरीकरण अउ तालाब मन के तीर सोलर पंप लगाए बर स्वीकृति दीन। अइसनहे तीन किसान मन बर व्यक्तिगत तालाब खनन बर घलोक मंजूरी दीन। उमन गांव म संचालित करे जात उचित मूल्य दुकान के घलोक निरीक्षण करिन। ए दौरान गांव वाले मन ह बताइन कि गांव म मनखे मन ल समय म राशन मिलत हे। ए महिना के राशन गांव के मनखे उठा उरे हें। मुख्यमंत्री ह कक्षा सातवीं म पढ़इया छात्र सोमेन्द्र साहू अउ कक्षा चौथी के छात्रा कु. पोमेश साहू, संजना साहू अऊ ज्ञानेन्द्र ल अपन तीर बलाके नौ अउ चौदा के पहाड़ा घलोक पूछिन, जेखर वाचन करके लइका मन ह सुनाइन।




डॉ. सिंह ह गांव वाले मन ले चर्चा के बाद इहां हायर सेकेण्डरी भवन निर्माण बर कलेक्टर अउ वन मण्डलाधिकारी ल जल्दी जमीन चिन्हांकित करे ल कहिन। उमन गांव म बनाय गए प्रधानमंत्री गृह के अवलोकन करिन अऊ योजना ले लाभांवित हितग्राही श्रीमती कुमारीबाई नेताम, श्रीमती बहुराबाई यादव, फूलकुंवर निषाद अऊ श्रीमती तुलसीबाई साहू ले मुलाकात करिन। डॉ. सिंह ह गांव वाले मन के मांग म कोटेश्वर धाम बर पहुंच मार्ग अउ सोलर पैनल अऊ सामुदायिक निर्माण के घलोक घोषणा करिन।

मुहाचाही:  मुख्यमंत्री ह जनता ल दीस होली के बधाई

मुख्यमंत्री ह बूढ़ादेव मंदिर म करिन पूजा-अर्चना
मुख्यमंत्री डॉ. सिंह ह ग्राम डोंगरडुला के बूढ़ादेव मंदिर म पूजा-अर्चना करिन अऊ प्रदेश के जनता के खुशहाली बर कामना करिन। उमन गांव वाले मन के मांग म बूढ़ादेव मंदिर के फर्शीकरण काम बर तीन लाख रूपिया प्रदान करे के घोषणा घलोक करिन। ए अवसर म सिहावा विधानसभा क्षेत्र के विधायक श्री श्रवण मरकाम, पूर्व विधायक श्रीमती पिंकी शाह, मुख्य सचिव श्री अजय सिंह, मुख्यमंत्री के प्रमुख सचिव श्री अमन कुमार सिंह अऊ बड़ संख्या म ग्रामीणजन उपस्थित रहिन।