डॉ. रमन सिंह नरेन्द्र मोदी राजेश मूणत रायपुर

प्रधानमंत्री ह नवा रायपुर के नान्हें स्कूली लइका मन ले करिन मुलाकात

  • श्री मोदी ह लइका मन ले कहिन: खूब पढ़व, खेलव अऊ बड़े होके करव बड़का काम
  • लइका मन ह प्रधानमंत्री ल बताइन अपन दिनचर्या

रायपुर, 14 जून 2018। प्रधानमंत्री श्री नरेन्द्र मोदी ह आज इहां नवा रायपुर म एकीकृत कमांड अउ नियंत्रण केन्द्र के लोकार्पण करे के बाद उहां क्रिस्टल हाउस स्कूल के नान्हें लइका मन ले मुलाकात करिन। श्री मोदी ह लइका मन ल आशीर्वाद दीन अऊ कहिन – खूब पढ़व, खेलव अऊ बड़े होके बड़े काम करव। हम आपमन ल बता देवन के नवा रायपुर विकास परियोजना के प्रभावित 42 गांव मन के लइका मन बर सेक्टर 25 म ये स्कूल पांच एकड़ के रकबा म नवा रायपुर विकास प्राधिकरण (एन.आर.डी.ए.) कोति ले करीबन पांच करोड़ 57 लाख रूपिया के लागत ले बनवाए गए हे। एन.आर.डी.ए. के एकीकृत कमांड अउ नियंत्रण केन्द्र म प्रधानमंत्री ले ए स्कूली लइका मन के मुलाकात के समय मुख्यमंत्री डॉ. रमन सिंह घलोक ऊंखर संग रहिन।
प्रधानमंत्री ल लइका मन ह बाल सुलभ अंदाज म अपन दिनचर्या अऊ स्वच्छता के बात बताइन। उमन कहिन कि वो खुद गंदगी नइ फैलावंय अऊ दूसर मन ल घलव गंदगी फैलाय ले रोकथें। प्रधानमंत्री श्री मोदी ह लइका मन ले बड़ प्यार ले ऊंखर घर, कुटुंब, उंखर पढ़ाई, खेल आदि के बारे म पूछिंन। लइका मन ह बड़ आदर ले उंखर जवाब घलोक दीन। प्रधानमंत्री श्री मोदी ह लइका मन ले कहिन कि सुघ्‍घर मेहनत करव, पढ़व, खूब खेलव अऊ बड़े होके बड़े काम करव। उमन लइका मन ले आज ले शुरू होवत फूटबाल वर्ल्ड कप ल घलोक देखे ल कहिन। ए अवसर म छत्तीसगढ़ के आवास अउ पर्यावरण मंत्री श्री राजेश मूणत घलोक उपस्थित रहिन। स्कूल के शिक्षिका मनीषा अग्रवाल घलोक उहां मौजूद रहिन।
आप मन जानतेच हवव के नवा रायपुर क्षेत्र के प्रभावित 42 गांव के ग्रामीण लइका मन ल निःशुल्क आधुनिक शिक्षा मुहैया कराए बर क्रिस्टल हाउस स्कूल चालू करे गए हे। नवा रायपुर के सेक्टर 25 म नवा रायपुर विकास प्राधिकरण अऊ हाउसिंग बोर्ड के सहयोग ले करीबन पांच करोड़ 57 लाख रूपिया के लागत ले 5 एकड़ क्षेत्र म ये स्कूल बनाय गए हे। अभी हाले म इहां 380 लइका पढ़त हें।

मुहाचाही:  मुख्यमंत्री ले छत्तीसगढ़ अंशकालीन स्कूल सफाई कर्मचारी संघ के प्रतिनिधि मन ह करिन मुलाकात