डॉ. रमन सिंह बृजमोहन अग्रवाल राजेश मूणत

मुख्यमंत्री ह करिस प्रदेश के पहिली धनुषाकार पुल के लोकार्पण

रायपुर, 17 मार्च 2018। मुख्यमंत्री डॉ. रमन सिंह ह काल संझा राजधानी रायपुर के काशीराम नगर के आघू रिंग रोड क्रमांक-01 के ऊपर करीबन 46 करोड़ रूपिया के लागत ले बने धनुषाकार फ्लाई-ओव्हर (आर्च ब्रिज) के लोकार्पण करिन। उमन ए विशाल ओव्हर ब्रिज उपर भारतीय डाक विभाग के तरफ ले विशेष आवरण घलोक जारी करिन।
मुख्यमंत्री ह लोकार्पण समारोह ल संबोधित करत कहिन कि छत्तीसगढ़ अऊ राजधानी रायपुर के गौरवशाली विकास यात्रा म ये आर्च ब्रिज एक महत्वपूर्ण कड़ी के रूप म जुरे जात हे। करीबन 63 मीटर लंबा गर्डर म धनुष आकार म बने अऊ दू हजार रंगीन एलईडी बल्ब के रौशनी ले दमकत ये ब्रिज छत्तीसगढ़ के सबले सुन्‍दर पुल हे। पहिली मनखे हावड़ा ब्रिज देखे कोलकाता अऊ अमेरिका म सेनफ्रांसिसको ब्रिज देखे जात रहिन। अब ए आर्च ब्रिज ल देखे मनखे रायपुर आहीं। ए ब्रिज ले यातायात ल सुव्यवस्थित बनाए म मदद मिलही।




कार्यक्रम म कृषि अउ जल संसाधन मंत्री श्री बृजमोहन अग्रवाल, लोक निर्माण मंत्री श्री राजेश मूणत, विधायक श्री श्रीचंद सुन्दरानी, मनोनित विधायक श्री बर्नाड जोसेफ रोड्रिक्स अऊ नगर निगम रायपुर के सभापति श्री प्रफुल्ल विश्वकर्मा विशिष्ट अतिथि के रूप म उपस्थित रहिन। मुख्यमंत्री ह ए अवसर म कहिन कि स्मार्ट सिटी के रूप म रायपुर पहिचान बनत हे। रायपुर म पंडित दीनदयाल ऑडिटोरियम इंडोर स्टेडियम, अंतर्राष्ट्रीय हॉकी स्टेडियम, चौड़ा सुन्दर सड़क बनाए गए हे। राजधानी म 437 करोड़ रूपिया के लागत ले तीन रेल्वे ओव्हर ब्रिज अऊ चार फ्लाई ओव्हर के निर्माण भाटागांव, कुशालपुर अऊ राजेन्द्र नगर म अऊ शास्त्री चौक म स्काई वॉक बनाए जाही। एखर से राजधानी वासी मन ल सुगम यातायात के सुविधा मिलही।
कृषि अउ जल संसाधन मंत्री श्री बृजमोहन अग्रवाल ह कहिन कि ये छत्तीसगढ़ के पहला आर्च ब्रिज हे, जऊन उत्तर, दक्षिण, पूरब, पश्चिम चारो दिशा ले पूरा शहर ल जोरही। उमन कहिन कि केनाल रोड के बने ले राजधानी के यातायात सुगम होही। लोक निर्माण मंत्री श्री राजेश मूणत ह अतिथि मन के आभार प्रकट करत राजधानी रायपुर म होए कई ठन विकास काम मन के जानकारी दीन। कार्यक्रम म लोक निर्माण विभाग के सचिव श्री सुबोध कुमार सिंह संग विभाग के वरिष्ठ अधिकारी, बहुत अकन जनप्रतिनिधि अऊ बड़ संख्या म नागरिक उपस्थित रहिन।



मुहाचाही:  गुजरात के मुख्यमंत्री के रायपुर म श्री मूणत ह करिस आत्मीय स्वागत