Success Stories Success story महासमुंद

दिव्यांग सविता ल बैटरी चलित मोटराईज्ड ट्रायसिकल मिले ले मिलीस नवा दिशा

मोटराईज्ड ट्रायसिकल मिले ले दिव्यांग सविता के राह होइस आसान

महासमुंद, 26 जून 2018। जिला के दिव्यांगजन मन ल आर्थिक अऊ सामाजिक रूप ले सशक्त बनाए बर सरलग उदीम करे जात हे। राज्य शासन के समाज कल्याण विभाग कोति ले दिव्यांग मन ल आर्थिक रूप ले आत्मनिर्भर बनाए अउ ओ मन ल उपकरण प्रदान करे बर कई ठन योजना संचालित करे जात हे। ए योजना मन म ले एक कृत्रिम अंग सहायक उपकरण योजना के तहत आज स्थानीय महासमुंद के बस स्टैण्ड के तीर रहइया 22 वर्षीय दिव्यांग कुमारी सविता निषाद ल कलेक्टर श्री हिमशिखर गुप्ता कोति ले निःशुल्क बैटरी चलित मोटराईज्ड ट्रायसिकल प्रदाय करे गीस। ए अवसर म कलेक्टर ह उंखर सराहना करत ओ मन ल सावधानीपूर्वक ट्रायसिकल चलाय के समझाईश दीन।




कुमारी सविता ह बताइस कि सविता दुनों पांव ले 80 प्रतिशत दिव्यांग हे। ए कारण ओ मन ल कहूं आए-जाए म बिक्‍कट कठिनाई के समाना करना परत रहिस। ओला चार साल पहिली समाज कल्याण विभाग कोति ले ट्रायसायकल देहे गए रहिस। अब वो सायकल अड़बड़ जर्जर हो जाय के सेती चलाए म असुविधा होवत रहिस। ए कारण ओला 12 जून के दिन कलेक्टर जनदसन म मोटराईज्ड ट्रायसिकल देवाए बर अनुरोध करे रहिस। जऊन म कलेक्टर ह उंखर स्थिति ल ध्यान म रखके समाज कल्याण विभाग के अधिकारी ल ट्रायसिकल देवाए के निर्देश दिए रहिन।
राज्य शासन के समाज कल्याण विभाग कोति ले ओला अतका जल्दी ट्रायसिकल के अनुपम उपहार मिले ले वोखर खुशी ले आंखी छलक गीस। ओ ह बताइस के वो अभी बीए आखरी साल के छात्रा हे अब पढ़ाई करे बर कॉलेज जाये, अपन सहेली मन ले मुलाकात करे अऊ अपन जरूरत के चीज मन ल लाय ले जाय म ओला काफी सहुलियत होही। अब ओ ह कोनो उपर आश्रित न होके आत्मनिर्भर बनना चाहत हे। ट्रायसिकल मिले ले बिना कोनो के मदद ले ओ मन आना-जाना कर सकत हे। कुमारी सविता ह राज्य शासन कोति ले सबो वर्ग मन बर संचालित जनकल्याणकारी योजना मन के सराहना करिन जेखर तहत आज ओला मोटराईज्ड ट्रायसिकल मिलीस। ए अवसर म जिला पंचायत के मुख्य कार्यपालन अधिकारी श्री ऋतुराज रघुवंशी, समाज कल्याण विभाग के उपसंचालक श्री एम.एम. नाग उपस्थित रहिन।



मुहाचाही:  वैज्ञानिक खेती ले दशपुर के प्रकाश निषाद बनिस लखपति