Yojana डॉ. रमन सिंह रायपुर

मुख्यमंत्री के अध्यक्षता म वीडियो कॉन्फ्रेसिंग: ग्राम स्वराज अभियान के समीक्षा

रायपुर, 27 अप्रैल 2018। मुख्यमंत्री डॉ. रमन सिंह ह काली संझा अपन निवास कार्यालय म वीडियो कॉन्फ्रेसिंग के संग प्रदेश के सबो जिला कलेक्टर मन के बैठक लीन। डॉ. सिंह ह बैठक म राष्ट्रव्यापी ग्राम स्वराज अभियान के तहत राज्य म चलत काम मन के समीक्षा करिन। केन्द्र सरकार के निर्देश म छत्तीसगढ़ म घलोक ये अभियान 14 अप्रैल ले शुरू हो गए हे, जऊन पांच मई तक चलही।
मुख्यमंत्री के अध्यक्षता म काल के वीडियो कॉन्फ्रेसिंग म ग्राम स्वराज अभियान के तहत केन्द्र सरकार के प्रमुख योजना मन के क्रियान्वयन के विस्तृत समीक्षा करे गइस। डॉ. सिंह ह जिला कलेक्टर मन ले कहिन कि अभियान के तहत प्रदेश म 11 जिला मन के लक्षित सबो 346 गांव मन के शत-प्रतिशत पात्र हितग्राही मन ल अभियान चलाके प्रधानमंत्री के प्राथमिकता वाले सात योजना मन के लाभ देलाना सुनिश्चित करे जाए।




मुख्यमंत्री ह कहिन कि ए अभियान के तहत प्रदेश के चुने गए 346 गांव मन म सबो पात्र हितग्राही मन ल प्रधानमंत्री उज्ज्वला योजना के तहत रसोई गैस कनेक्शन, सौभाग्य योजना म हर घर म बिजली कनेक्शन, उजाला योजना म एलईडी वितरण संग प्रधानमंत्री जन-धन योजना के तहत बैंक खाता खोलवावंय, प्रधानमंत्री जीवन ज्योति बीमा योजना, प्रधानमंत्री सुरक्षा बीमा योजना के लाभ देवाए अऊ मिशन इन्द्रधनुष के अंतर्गत लइका मन अऊ गर्भवती महिला मन के टीकाकरण के शत-प्रतिशत लक्ष्य पांच मई तक देना सुनिश्चित करे जाए।
आप मन जानतेच होहू के छत्तीसगढ़ म ग्राम स्वराज अभियान के तहत 14 अप्रैल ले अवइया पांच मई तक प्रदेश के दस हजार 971 ग्राम पंचायत मन के करीबन बीस हजार गांव मन म प्रधानमंत्री के प्राथमिकता वाले योजना के लाभ हितग्राही मन ल देवाए बर कार्यक्रम मन के आयोजन करे जात हे। ए अभियान के तहत छत्तीसगढ़ म सबले जादा कार्यक्रम के आयोजन करे गए हे। कार्यक्रम मन के आयोजन के दृष्टि ले छत्तीसगढ़ देश म पहिली स्थान म हे। ए अभियान म 346 अइसे गांव मन के चयन करे गए हे, जिहां गरीब परिवार मन के संख्या तुलनात्मक रुप ले जादा हे। एमां रायपुर जिला के 102, बिलासपुर जिला के 96, जांजगीर-चांपा जिला के 70, दुर्ग जिला के 27, रायगढ़ जिला के 21, कबीरधाम जिला के 16, राजनांदगांव जिला के 06, कोरबा जिला के 03, महासमुन्द अऊ धमतरी जिला के दू-दू अउ जशपुर जिला के एक गांव सामिल हे। ए सबो गांव मन म सबो पात्र हितग्राही मन ल योजना के लाभ देवाए के लक्ष्य सुनिश्चित करे गए हे। बैठक म बताए गीस कि सौभाग्य योजना के तहत चिन्हांकित 346 गांव मन म 230 गांव मन के शत-प्रतिशत घर मन म बिजली के कनेक्शन दीए गए हे। ए योजना के क्रियान्वयन म छत्तीसगढ़ देश म चौथइया स्थान म हे। मुख्यमंत्री ह पांच मई तक सबो 346 गांव मन के शत-प्रतिशत घर मन म बिजली कनेक्शन देहे के निर्देश दीन। एलईडी वितरण के उजाला योजना के अंतर्गत प्रदेश म 90 करोड़ एलईडी बल्ब वितरित करे गए हे।



बैठक म ऊर्जा विभाग के सचिव श्री सिद्धार्थ कोमल सिंह परदेशी ह बताइस कि गरीबी लकीर के नीचे के 95 प्रतिशत परिवार मन ल एलईडी बल्ब वितरण के काम पूरा हो गए हे, जबकि ग्राम स्वराज योजना के अंतर्गत चुने गए 346 गांव मन म ले 156 गांव मन म शत-प्रतिशत परिवार मन ल एलईडी बल्ब के वितरण करे गए हे। शेष 190 गांव मन म कैम्प लगाके एलईडी वितरण के काम पांच मई तक पूरा कर ले जाही। उमन बताइन के पांच मई तक हरेकदिन ए गांव मन म 32 कैम्प लगाके एलईडी बल्ब वितरण करे जाही। बैठक म ये जानकारी घलोक दे गइस कि प्रधानमंत्री जन-धन योजना के तहत 13 हजार 800 के लक्ष्य के विरूद्ध अब तक 9600 बैंक खाता खोले गए हे। बैठक म बताए गीस कि मिशन इन्द्रधनुष के अंतर्गत पांच साल ले कम आयु के 79 प्रतिशत लइका मन के टीकाकरण अऊ प्राथमिक शाला के 91 प्रतिशत लइका मन के टीकाकरण के काम पूरा कर ले गए हे।
बैठक म राज्य योजना आयोग के उपाध्यक्ष श्री सुनिल कुमार, मुख्य सचिव श्री अजय सिंह, पंचायत अउ ग्रामीण विकास विभाग के अपर मुख्य सचिव श्री आर.पी. मंडल, मुख्यमंत्री के प्रमुख सचिव श्री अमन कुमार सिंह, वित्त विभाग के प्रमुख सचिव श्री अमिताभ जैन, मुख्यमंत्री के सचिव श्री सुबोध कुमार सिंह, खाद्य विभाग के सचिव श्रीमती ऋचा शर्मा अऊ कृषि विभाग के सचिव श्री अनूप श्रीवास्तव संग संबंधित विभाग मन के वरिष्ठ अधिकारी उपस्थित रहिन।



मुहाचाही:  कृषक जीवन ज्योति योजना : कृषि पंप के बिजली बिल म छूट