Lok Suraj केदार कश्यप

जनता ल जरूरी सुविधा देहे खातिर सरकार बाना बांधे हे- केदार

भारतीय जनता पार्टी के प्रदेश व्‍यापी जनसम्पर्क पदयात्रा अभियान के तहत सरलग जनता ले रूबरू होवत स्कूल शिक्षा मंत्री केदार कश्यप ह आज बस्तर विकासखण्ड के बडे़राजपुर, मुण्डागांव, बड़ेअमाबाल, छोटाआमाबाल, हिरलाभाटा, चमिया, सिवनी अऊ देवड़ा क्षेत्र के सघन दौरा करिन।
मंत्री केदार कश्यप जी उपस्थित जन समूह ल ए 14 साल म सरकार के कल्‍यानकारी योजना मन के जानकारी दीन। उमन कहिन कि आज सरकार महिला मन ल लेके लइका, जवान अऊ सियान मन तक सबो बर कोनो न कोनो योजना के माध्यम ले सबो के जीवन स्तर ल ऊंचा उठाए के प्रयास करत हे अऊ येमा सफल घलव होवत हे। प्रदेश म सरकार निर्धन कन्या मन के बिहाव करावत हे, गरीब मन ल प्रधानमंत्री आवास योजना के तहत पक्का मकान देहे जात हे, उज्ज्वला योजना के तहत रसोई गैस के वितरण करत हे। सरकार के अड़बड़ अकन लोक कल्‍यानकारी योजना मन जनता तक बने सहिन पहुँचत हवय के नहीं एला जाने खातिर हमन जनसम्पर्क यात्रा के माध्यम ले आप मन के गांव अऊ घर तक पहुँचत हवन।
कार्यक्रम ल संबोधित करत युवा आयोग के अध्यक्ष कमल चंद भंजदेव ह भाजपा सरकार कोति ले करे जात विकास कार्य मन के बारे म बतात कहिन कि एखर ले पहिली के सरकार के इसारा म मोर दादा के हत्या करे गए रहिस। अपन महाराजा के उपर गुजरे वो 25 मार्च के काला दिन ल बस्‍तर के जनता कइसे भुला सकत हे। आज समय बदल गए हे रमन सरकार गांव गरीब अऊ किसान के हित म काम करत हे।



मुहाचाही:  मुख्यमंत्री सामिल होइन भटगांव समाधान शिविर म