बृजमोहन अग्रवाल

स्वच्छ अऊ स्वस्थ राष्ट्र के निर्माण म धोबी समाज के अहम योगदान- बृजमोहन

बालोद राज झेरिया धोबी समाज के वार्षिक सम्मेलन म बतौर मुख्य अतिथि प्रदेश के कृषि अउ सिंचाई मंत्री बृजमोहन अग्रवाल ह शिरकत करिन।
रायपुर, 01.04.2018। ग्राम सोहतरा (झलमला) म आयोजित बालोद राज झेरिया धोबी समाज के वार्षिक सम्मेलन म बतौर मुख्य अतिथि प्रदेश के कृषि अउ सिंचाई मंत्री बृजमोहन अग्रवाल ह शिरकत करिन। ए अवसर म समाज ल संबोधित करत बृजमोहन अग्रवाल ह कहिन कि पुरातन काल ले स्वच्छ अऊ स्वस्थ समाज के निर्माण म धोबी समाज के सबले महत्वपूर्ण योगदान रहे हे। आज घलोक, ये समाज अपन काम ल बेहतर ढंग ले करत आत हे। फेर कोनो समाज आगू तभे बढ़थे जब वो सामाजिक, राजनीतिक अऊ आर्थिक रूप ले सक्षम होथे। धोबी समाज ल अभी अऊ सक्षम होना हे ताकि समाज के कमजोर तबके के भला करे जा सकय। ए सम्मेलन म राष्ट्रीय स्वयंसेवक संघ के वरिष्ठ पदाधिकारी बिसरा राम यादव विशेष रुप ले उपस्थित रहिन। उमन घलोक धोबी समाज के मार्गदर्शन करिन।
अपन उद्बोधन म बृजमोहन अग्रवाल ह कहिन कि हमार भारत देश म सौ साल पहिली संत घाडगे जी ह स्वच्छ भारत अभियान चलाए रहिन, एखर संगकच सामाजिक अस्पृश्यता-भेदभाव आदि ले भारतीय समाज ल मुक्‍त करे के क्रांतिकारी प्रयास घलोक उमन करे रहिन। आज हमार देश के प्रधानमंत्री नरेंद्र मोदी जी संत घाडगे के पदचिन्ह म चलत हें अऊ स्वच्छ भारत अभियान के संगे संग एक भारत श्रेष्ठ भारत बनाए के दिशा म पूरा निष्ठा अऊ ईमानदारी के संग काम करत हें।




बृजमोहन ह कहिन कि समाज के मनखे मन अपन पारंपरिक व्यवसाय ल आधुनिक तरीका ले करहीं त ओ मन आर्थिक रूप ले समृद्ध हो सकहीं। सरकार के कई ठन योजना हे जऊन युवा ल आगू बढ़ाए बर प्रोत्साहित करथे।
परंपरागत व्यावसाय ल आप मन जतका अच्छा तरीका ले सम्हाल सकत हव दूसर कोनो नइ कर सकय। ए खातिर मोर हमेशा मानना रहे हे कि व्यवसाय करे ल इक्छुक मनखे अपन सामाजिक परंपरागत व्यवसाय ल आधुनिक तरीका ले करहीं त उंखर सफलता निश्चित होही।
बृजमोहन ह कहिन कि समाज के महत्व तब हे जब हम कमजोर तबका ल ऊपर लेके आबोन। उंखर पीरा ल कम करे म हम अपन योगदान देवन। हर समाज म अमीर अऊ गरीब के घलोक भेद होथे। अइसन म सक्षम मनखे मन ल चाही कि अपन समाज के कमजोर तबके के मदद करंय। समाज घलोक सबके सहयोग ले कमजोर कुटुंब के लइका मन के शिक्षा, उंखर बेटी के बिहाव अऊ उंखर बेहतर स्वास्थ्य के चिंता करंय। ये काम हम सबो के सामाजिक दायित्य घलोक ये। ए अवसर म श्री अग्रवाल ह सामुदायिक भवन निर्माण बर 5 लाख रुपिया के स्वीकृति प्रदान करिन।
ए अवसर म भाजयुमों प्रदेश महामंत्री संजू नारायण सिंह, प्रहलाद रजक, चूड़ामणि निर्मलकर, रजनी रजक, शिवनारायण निर्मलकर, सुरेश निर्मलकर, पूर्व विधायक प्रीतम साहू, लाल महेंद्र सिंह टेकाम, जिला भाजपा अध्यक्ष लेखराम साहू, यादराम सोनवानी, अवधराम ग्वाल आदि उपस्थित रहिन।



मुहाचाही:  अफसर मन लउहे करव जनता के काम- बृजमोहन