छत्तीसगढ़ राजभाषा आयोग

मुख्यमंत्री ह करिन ‘लोक व्यवहार अऊ कार्यालयीन छत्तीसगढ़ी’ पुस्तक के विमोचन

रायपुर, 4 अप्रैल 2018। मुख्यमंत्री डॉ. रमन सिंह ह आज इहां अपन निवास कार्यालय म छत्तीसगढ़ राजभाषा आयोग कोति ले ‘लोक व्यवहार अऊ कार्यालयीन छत्तीसगढ़ी’ सीरसक ले प्रकाशित पुस्तक के विमोचन करिन। पुस्तक के लेखक छत्तीसगढ़ राजभाषा आयोग के अध्यक्ष डॉ. विनय कुमार पाठक हें।
मुख्यमंत्री ल डॉ. पाठक ह बताइन के पुस्तक म कार्यालयीन पत्र के हिन्दी, अंगरेजी के संग छत्तीसगढ़ी म घलोक प्रारुप दे गए हे, जेखर से कार्यालय मन म छत्तीसगढ़ी भाखा के उपयोग ल प्रोत्साहन मिल सकय। उमन बताइन कि मंत्रालय अऊ दूसर कार्यालय मन म छत्तीसगढ़ी के कार्यालयीन उपयोग के संबंध म आयोजित प्रशिक्षण के समय अधिकारी-कर्मचारी मन ह पत्र के छत्तीसगढ़ी प्रारुप के मांग करे गए रहिस। अधिकारी-कर्मचारी मन के सहूलियत बर ये पुस्तक प्रकाशित करे गए हे। मुख्यमंत्री ह कार्यालयीन उपयोग बर पुस्तक ल काफी उपयोगी बतात पुस्तक के प्रकाशन म डॉ. पाठक ल बधाई अऊ शुभकामना दीन।



मुख्यमंत्री ह कहिन कि छत्तीसगढ़ी भाखा के विकास के दृष्टि ले आयोग के ये प्रकाशन बहुत उपयोगी होही। डॉ. पाठक ह ये घलोक बताइन कि ए पुस्तक के पांच हजार प्रति छपवाके सबो शासकीय कार्यालय मन म निःशुल्क वितरित करे जाही। ए अवसर म वरिष्ठ साहित्यकार श्री विवेक तिवारी अऊ श्री राघवेंद्र दुबे घलोक उपस्थित रहिन। डॉ. पाठक ह छत्तीसगढ़ राजभाषा आयोग के दू बछर के उपलब्धि मन उपर प्रकाशित स्मारिका के प्रति अऊ श्री राघवेन्द्र दुबे ह कवि अऊ साहित्यकार पंडित अमृतलाल दुबे ल समर्पित समन्वय पत्रिका के वार्षिक अंक मुख्यमंत्री ल भेंट करे गीस।


मुहाचाही:  होली पंचमी के रंग बेलतरा सीपत बिलासपुर के संग