केदार कश्यप

नारायणपुर जिला के अतिसंवेदनशील क्षेत्र म खुदे गाड़ी चलाके पहुंचिन मंत्री केदार कश्यप

  • नारायणपुर जिला के अतिसंवेदनशील क्षेत्र महिमागवाड़ी गांव म आयुष्मान भारत दिवस के कार्यक्रम म खुदे गाड़ी चलाके पहुंचिन श्री केदार कश्यप
  • राष्ट्रव्यापी ग्राम स्वराज अभियान: आदिम जाति विकास मंत्री सामिल होइन आयुष्मान भारत दिवस कार्यक्रम म
  • प्रदेश म गरीब परिवार मन के स्वास्थ्य बर चलत हे कई योजना

नारायणपुर, 30 अपरेल 2018। आदिम जाति विकास मंत्री श्री केदार कश्यप अतिसंवेदनशील क्षेत्र ग्राम महिमागवाड़ी म राष्ट्रव्यापी ग्राम स्वराज अभियान के तहत मनाये जात आयुष्मान भारत दिवस के कार्यक्रम म खुद गाड़ी चलाके पहुंचिन। गांव वाले मन ल सम्बोधित करत श्री कश्यप ह कहिन कि केन्द्र सरकार अऊ राज्य सरकार हमेशा ले जनता के सेहत बर सजग रहे हे। कई गंभीर बीमारी मन के प्रति सरकार के उदीम के लाभ हमला मिलते हे। केन्द्र सरकार ह गरीब मन के स्वास्थ्य ले संबंधित लाभ बर ‘‘आयुष्मान भारत‘‘ के नाम ले योजना चालू करे हवय। आज आयुष्मान भारत दिवस प्रदेश के सबो ग्राम पंचायत मन म मनाए जात हे।
मंत्री श्री केदार कश्यप ह सभा ल संबोधित करत कहिन कि प्रदेश म पाछू 14 साल ले सरलग विकास के काम होवत हे। उमन कहिन के पहिली गरीब मनखे मन तीर इलाज बर दवाई बिसाए बर पइसा नइ होत रहिस, जेखर सेती ओ मन ल परेशानी के सामना करना परत रहिस। एला देखत राज्य म मुख्यमंत्री स्वास्थ्य सुरक्षा योजना लागू करे गीस। ए योजना के तहत पहिली 30 हजार रूपिया तक के निःशुल्क इलाज के सुविधा दे गइस रहिस, जऊन ल बढ़ाके अब 50 हजार रूपिया कर दे गए हे। उमन मुख्यमंत्री खाधान्न सुरक्षा योजना, प्रधानमंत्री उज्ज्वला योजना, अऊ प्रधानमंत्री घर योजना के घलोक उल्लेख करिन।





आदिम जाति विकास मंत्री ह कहिन कि बहुत जल्दी प्रदेश के 55 लाख मनखे मन ल निःशुल्क स्मार्ट फोन के वितरण करे जाही। मंत्री ह आगू कहिन कि आज ले आयुष्मान भारत दिवस म गरीब अउ साधन विहनी परिवार मन ल स्वास्थ्य सुरक्षा प्रदान करे के लक्ष्य रखे गए हे। गरीब परिवार मन के चयन सामाजिक, आर्थिक अउ जातीय जनगणना के सूची के आधार म करे गए हे। ए मिशन के अन्तर्गत सबो पात्र परिवार मन ल कई बीमारी मन म पांच लाख रूपिया प्रति कुटुंब प्रतिवर्ष इलाज के सुविधा देश के कोनो अनुबंधित अस्पताल म मिलही। उमन कहिन कि आज स्वास्थ्य विभाग के अधिकारी मन, कर्मचारी मन संग म मितानिन अऊ ग्राम पंचायत के सचिव मन कोति ले आयोजित ग्राम सभा मन म पात्र परिवार मन के जानकारी देहे जात हे। उमन आगू कहिन कि ए योजना के तहत साल 2022 तक देश म करीबन 1.5 लाख स्वास्थ्य अऊ वेलनेस केन्द्र खोले के लक्ष्य रखे गए हे। प्रधानमंत्री श्री नरेन्द्र मोदी ह अम्बेडकर जयंती के अवसर म छत्तीसगढ़ के बस्तर संभाग के ग्राम जांगला जिला बीजापुर म आयुष्मान भारत योजना के पहिली चरण म हेल्थ एण्ड वेलनेस सेंटर के शुभारंभ करे रहिन।
ए अवसर म मुख्य कार्यपालन अधिकारी जिला पंचायत श्री अशोक चौबे, अकतहा पुलिस अधीक्षक श्री अनिल सोनी, संगठन पदाधिकारी श्री नारायण मरकाम संग पंच-सरपंच के अलावा जनप्रतिनिधि अऊ बड़ी संख्या म ग्रामीणजन उपस्थित रहिन।


मुहाचाही:  बस्तर के संस्कृति ल प्रदर्शित करत दृश्य मन के मंत्री ह करिस प्रशंसा