बृजमोहन अग्रवाल रायपुर

2 मई के दिन प्रदेश के सबो विकासखंड मन म होही किसान कल्याण कार्यशाला

रायपुर, 27 अप्रैल 2018। अवइया 2 मई 2018 के दिन कृषि अउ किसान कल्याण विभाग भारत सरकार कोति ले देश के हर एक विकासखंड मन म किसान मन के आय दोगुना करे के दिशा म प्रयास करत जन जागरूकता बर किसान कल्याण कार्यशाला के आयोजन करे जात हे। छत्तीसगढ़ के सबो विकासखंड मन म ए आयोजन के तैयारी जोर शोर ले करे जात हे। कृषि, पशुपालन, सिंचाई मंत्री बृजमोहन अग्रवाल ह एखर बर जरूरी दिशा निर्देश अपन सबो विभाग मन ल दीन।



ए संबंध म बृजमोहन अग्रवाल ह कहिन कि प्रधानमंत्री नरेंद्र मोदी जी के नेतृव वाले केंद्र सरकार गाँव, गरीब अऊ किसान मन के हित म सरलग काम करत हे। साल 2022 तक देश के किसान मन के आय दुगुना करे के उंखर लक्ष्य हे। किसान हित के ए लक्ष्य ल पाये बर हम सब जुटे हवन। एकीकृत खेती म विशेष जोर देहे जात हे। इही तारतम्य म केंद्र सरकार के निर्देशानुसार 2 मई के दिन छत्तीसगढ़ के विकासखंड मन म किसान कल्याण कार्यशाला के आयोजन करे गए हे। ए कार्यशाला म कृषि, पशुपालन, उद्यानिकी, मत्स्य पालन, पंचायत संग समस्त विभाग मन के अधिकारी मौजूद रहिके किसान मन के मार्गदर्शन करहीं। उमन छत्तीसगढ़ के सबो किसान भाइ मन ले आग्रह करिन हे कि ओ मन 2 मई के दिन अपन विकासखंड मुख्यालय म आयोजित कृषक कल्याण कार्यशाला म पहुंचंय अऊ अपन तरक्की के राह ल आसान बनाए बर मार्गदर्शन प्राप्त करंय।




ए कार्यशाला म कृषि वैज्ञानिक नवा तकनीक के संग खेती करके जादा उत्पादन करके अपन आय किसान कइसे बढ़ावय ये गुर बताए जाही। ए दौरान कृषि, उद्यानिकी, पशुपालन, मत्स्य पालन ले संबंधित विभागीय अधिकारी मन अउ खांटी जानकार कोति ले किसान मन के आय दुगुना करे ले संबंधित कार्ययोजना के परिपेक्ष म केंद्र अउ राज्य सरकार के योजना मन विस्तृत जानकारी प्रदान करे जाही। इहां जम्‍मो विभाग मन के स्टॉल घलोक लगाए जाही जिहां ले घलोक शासकीय योजना मन के जानकारी प्राप्त करे जा सकही। पशुपालन विभाग कोति ले कार्यशाला स्थल म पशु चिकित्सा शिविर के आयोजन करे जाही जिहां संक्रमण वाले बीमारी मन ले बचे बर पशु मन के टीकाकरण घलोक करे जाही।


मुहाचाही:  केन्द्र कोति ले ’भविष्य के विकास के रूपरेखा‘ के तहत राजधानी रायपुर के चयन