Uncategorized

प्रधानमंत्री ह ‘जय जोहार’ के संग करिन जनता के अभिनंदन

रायपुर, 14 जून 2018। प्रधानमंत्री श्री नरेन्द्र मोदी ह छत्तीसगढ़ के संक्षिप्त प्रवास के समय आज भिलाईनगर के विशाल आमसभा म अपन भाषण के शुरूआत छत्तीसगढ़ी भाखा म करिन। उमन ‘जय जोहार’ कहिके जनता के अभिवादन अऊ अभिनंदन करिन। श्री मोदी ह छत्तीसगढ़ी भाखा म ही अपन भाषण के समापन घलोक करिन। श्री मोदी ह उद्बोधन के सुरू म जनता के अभिनंदन करत कहिन -दाई, दीदी, सियान, जवान, संगी, जहुरिया अउ नोनी-बाबू मन ला जय जोहार। भिलाई स्टील प्लांट छत्तीसगढ़ महतारी के कोरा के अनमोल रतन हे। ये ह छत्तीसगढ़ महतारी के परताप के चिन्हारी हे। उमन भाषण के आखरी म कहिन -मैं जब-जब छत्तीसगढ़ आथां, तब-तब इहां नवा-नवा काम-बुता, देखे बर मिलथे। इही कारण ले इहां के विकास होवत हे। श्री मोदी ह कहिन कि नवा छत्तीसगढ़ साल 2022 के पहिली नवा भारत के मार्ग प्रशस्त करही। उमन जनता ल बताइन के केन्द्र सरकार ह देश के स्वतंत्रता संग्राम म अपन प्राण के आहुति देवइया आदिवासी स्वतंत्रता संग्राम सेनानि मन के सम्मान म हर राज्य म संग्रहालय बनाए के निर्णय लेहे हें। उमन भिलाई म होए आत्मीय सम्मान के उल्लेख करत कहिन के आज इहां देश के हर राज्य के संस्कृति के दर्शन होइस। एक छोटे भारत देखे ल मिलीस। देश के एकता के दृश्य मैं ह देखेंव। भिलाईनगर के अऊ आप मन सब के आभार।

मुहाचाही:  जागृति के संग हर क्षेत्र म सशक्त होए हे महिला मन: डॉ. रमन सिंह