Lok Suraj

कलेक्टर ह दौरा के बेरा महिला मन ले करिन मया भरे गोठ-बात

नारायणपुर 13 मार्च 2018। पाछू सनिच्‍चर 10 मार्च के दिन कलेक्टर श्री टोपेश्वर वर्मा ह अपन आकाबेड़ा, नेड़नार दौरा के बेरा रद्दा म गाड़ी रूकवाके मछरी झोलत, लाख बिनत अऊ राशन ले लेके आवत महिला मन ले मया से मुलाकात करके ऊंखर गांव अऊ परिजन मन अऊ उंखर काम के बारे म अऊ ऊंखर सुख-दुख के बारे म हाल-चाल पूछिन अउ जानकारी लीन। कलेक्टर ह कुकड़ाझोर म अपन पोती के संग लाख बिनत सियान महिला ले उंखर हाल-चाल जानिन अऊ पूछिन के, ओ मन का बिनत हें। सियान महिला ह कमजोर आंखी ल मिच-मिचात कहिन कि ओ मन पेड़ ले गिरत लाख ल बिनत हें। ए मौसम म पेड़ ले लाख सूखा के, चटकके गिरथे। आदिवासी महिला मन अपन रोजी-रोटी बर लाख बिनके स्थानीय हाट-बाजार म बेचथें। इही बेरा म बीच रद्दा म गाड़ी रूकवाके कलेक्टर श्री वर्मा मछरी झोलत महिला मन तीर पहुंचिन। उमन बातचीत करिन अऊ कहिन कि ओ मन अतका छोट मछरी झोलत हें, का येकर ले ऊंखर बने जेवन होही। उमन महिला मन ले पूछिन कि का ओ मन मछलीपालन के व्यावसाय करहू, त ओ मन ऊंखर बर डबरी निर्माण करा सकत हें। महिला मन ह कहिन कि ओ मन गांव वाले मन ले पूछके बताहीं। उमन कहिन कि शासन-प्रशासन महिला मन के हर दुख-तकलीफ ल खतम करे म अग्रसर हे। उंखर खुशहाली बर बेहतर ले बेहतर योजनाएं संचालित करत हें, ओ मन एकर लाभ उठावंय।




कलेक्टर श्री टोपेश्वर वर्मा ह रद्दा म आकाबेड़ा ले राशन लेके लहुटत महिला मन ले घलोक चर्चा करिन अऊ ऊंखर सामान ल देखिन। उमन उंखर राशन कार्ड ल घलोक देखिन। एक महिला ह नाम पूछे म अपन नाम प्रमिला बताइस कलेक्टर ह उंखर ले ऊंखर गांव के बारे म जानकारी लीन अऊ गांव के जरूरी सुविधा मन के बारे म जानिन। डरे सहमे महिला मन ह कलेक्टर ल अपन गांव के संबंध म जानकारी ले अवगत कराइन। कलेक्टर ह अपन थेकुन बेरा म शासन के लाभकारी योजना मन के घलोक जानकारी दीन अउ कहिन के ओ मन एकर जरूर लाभ उठावंय। ए मौका म ऊंखर संग एसडीएम श्री दिनेश नाग, सहायक आयुक्त आदिवासी विकास श्री केएस मसराम, सीईओ जनपद पंचायत ओरछा श्री आशीष डे के संग आन अधिकारी उपस्थित रहिन।



मुहाचाही:  सिंचाई योजना मन के रूपांकित सिंचाई क्षमता के पूर्ण उपयोग सुनिश्चित करव : श्री बृजमोहन अग्रवाल