Sahitya डॉ. रमन सिंह

मुख्यमंत्री ह वयोवृद्ध पत्रकार-साहित्यकार श्री श्यामलाल चतुर्वेदी के पांव छूके लीन असीस

बिलासपुर, 12 मार्च 2018। मुख्यमंत्री डॉ. रमन सिंह ह आज संझा राज्य के संभागीय मुख्यालय बिलासपुर म स्थानीय प्रेस क्लब के नवीनीकृत भवन के लोकार्पण करिन। उमन ए अवसर म वयोवृद्ध पत्रकार, साहित्यकार अऊ छत्तीसगढ़ राज भाखा आयोग के पहिली अध्यक्ष श्री श्यामलाल चतुर्वेदी ल प्रेस क्लब के तरफ ले शॉल अऊ श्रीफल भेंटकरके सम्मानित करिन। मुख्यमंत्री ह पद्मश्री सम्मान बर उंनला चुने जाए म उनला बधाई दीन अऊ उंखर पांव छू के उंखर से असीस लीन।
आप मन ल बता देवन के बिलासपुर प्रेस क्लब भवन के नवा स्वरूप म निर्माण बर मुख्यमंत्री के पहल म नगरीय प्रशासन विभाग कोति ले 35 लाख रूपये मंजूर करे गये रहिस। मुख्यमंत्री ह प्रेस क्लब के सबो सदस्य अऊ पदाधिकारी मन ल ए भवन के नवनिर्माण बर बधाई अऊ शुभकामना दीन। उमन कहिन कि लोक सुराज अभियान ल जन-जन तक पहुंचाए म पत्रकार मन के महती भूमिका हे। उमन बिलासपुर शहर अऊ जिला के विकास म मीडिया के योगदान के घलोक तारीफ करिन।

ये अवसर म मुख्यमंत्री डॉ. रमन सिंह ह प्रदेश के वयोवृद्ध साहित्यकार अऊ छत्तीसगढ़ राजभाषा आयोग के पहिली अध्यक्ष पंडित श्यामलाल चतुर्वेदी के साहित्य साधना उपर केन्द्रित पुस्तक के विमोचन घलव करिन। डॉ. सुषमा शर्मा ह ‘पंडित श्यामलाल चतुर्वेदी अऊ उंखर साहित्य साधना’ सीरसक ले ए पुस्तक के रचना करे हें। आप मन ल बता देवन के करीबन डेढ़ महीना पहिली गणतंत्र दिवस के अवसर म भारत सरकार कोति ले पंडित श्यामलाल चतुर्वेदी ल पद्मश्री अलंकरण ले सम्मानित करे के घोषणा करे हे। ओ मन ल राष्ट्रपति श्री रामनाथ कोविन्द के हाथ ये सम्मान मार्च-अपरेल म नई दिल्ली म आयोजित समारोह म देहे जाही।
ए अवसर म नगरीय प्रशासन अऊ वाणिज्य अउ उद्योग मंत्री श्री अमर अग्रवाल, खाद्य, नागरिक आपूर्ति अऊ उपभोक्ता संरक्षण मंत्री श्री पुन्नूलाल मोहले, गृह निर्माण मंडल के अध्यक्ष श्री भूपेन्द्र सवन्नी, मुख्यमंत्री के विशेष कर्तव्यस्थ अधिकारी श्री विक्रम सिसोदिया, नगर निगम के महापौर श्री किशोर राय, संभागीय कमिश्नर श्री टी.सी. महावर, कलेक्टर श्री पी. दयानंद, प्रेस क्लब के अध्यक्ष श्री तिलक राज सलूजा, सचिव श्री विश्वेश ठाकरे, कोषाध्यक्ष श्री रमन दुबे संग कई पदाधिकारी अऊ सदस्य उपस्थित रहिन।



मुहाचाही:  नई दिल्ली म डॉ. रमन सिंह के प्रेस क्रॉन्फ्रेंस