नारायणपुर

रायपुर-जगदलपुर-विशाखापट्न यात्री विमान सेवा के शुभारंभ

  • ए सेवा ले जगदलपुर-रायपुर के दूरी घटके 40 मिनट के हो गए
  • प्रदेश के पहिली घरेलू यात्री विमान सेवा म अबूझमाड़ के श्री लालूराम ह करिस सफर
  • पहिली घरेलू यात्री विमान सेवा म अबूझमाड़ ले पहिली यात्री बनिस लालूराम
  • अबूझमाड़ ल अऊ नजदीक ले बूझे-जाने लगहीं मनखे

नारायणपुर 14 जून 2018। गुरूवार 14 जून के दिन प्रदेश के संगेच खास तौर म नारायणपुर जिला के विकासखण्ड ओरछा (अबूझमाड़) बर घलोक खास रहिस। ए इलाका के दूरस्थ अंचल म बसे गांव ताहकाडोंड के श्री लालूराम मण्डावी प्रदेश के पहिली घरेलू यात्री विमान सेवा रायपुर-जगदलपुर-विशाखापट्नम के उद्घाटन के बेराम जगदलपुर ले रायपुर तक हवाई सफर करिस। एकरे संग श्री लालूराम अबूझमाड़ ले प्रदेश के पहिली घरेलू यात्री विमान सेवा म सफर करइया पहिली यात्री बनिस। उंखर यात्रा के आयोजन अबूझमाड़ विकास अभिकरण कोति ले करे गए रहिस। जिला मुख्यालय ले करीबन 40 किलोमीटर दूरिहा स्थित ताहकाडोंड धुर नक्सल प्रभावित गांव हे। जेमां करीबन 25 परिवार के 100 मनखे निवास करथें। जिहां आम आदमी जाय ले कतराथे। अब बस्तर के मनखे मन के संगेच अबूझमाड़ के मनखे घलोक हवाई सफर कर सकही।
प्रधानमंत्री श्री नरेन्द्र मोदी ह अपन रायपुर-भिलाई प्रवास के बेरा छत्तीसगढ़ के जनता ल राज्य के पहिली घरेलू यात्री विमान सेवा के सौगात दीन। उमन केन्द्र सरकार के ‘उड़ान‘ परियोजना के तहत आम जनता ल कम कीमत म हवाई यातायात के सुविधा दे बर जगदलपुर-रायपुर-विशाखापट्न के बीच यात्री विमान सेवा के शुभारंभ करत जगदलपुर विमानतल के घलोक लोकार्पण करिन। ए सेवा के तहत एक निजी कंपनी के 19 सीट वाले विमान ले यात्री सिरिफ 1670 रूपिया के टिकट म रायपुर ले जगदलपुर सिरिफ 40 मिनट म पहुंच सकहीं। ए सेवा के जरिये जगदलपुर-रायपुर के दूरी घटके 40 मिनट के हो गीस।
ए अवसर म जगदलपुर म आदिम जाति विकास कल्याण मंत्री श्री केदार कश्यप, लोकसभा सांसद श्री दिनेश कश्यप, क्षेत्रीय विधायक श्री संतोष सिंह बाफना, बस्तर कमिश्नर श्री दिलीप वासनिकर, कलेक्टर श्री धनंजय देवांगन, पुलिस महानिरीक्षक श्री विवेकानंद सिन्हा, पुलिस अधीक्षक श्री डी. श्रवण, जनप्रतिनिधिगण, बड़ी संख्या म गणमान्य नागरिक अऊ कई ठन विभाग मन के अधिकारी मौजूद रहिन।

मुहाचाही:  बस्तर के संस्कृति ल प्रदर्शित करत दृश्य मन के मंत्री ह करिस प्रशंसा