बृजमोहन अग्रवाल

छत्तीसगढ़ के विकास म चार चाँद लगही महादेव घाट के लक्ष्मण झूला : बृजमोहन

जल्दी लोकार्पित होही महादेव घाट के लक्ष्मण झूला अऊ सुग्‍घर बगइचा

रायपुर, 17.04.2018। छत्तीसगढ़ के धर्मस्व कृषि अउ जल संसाधन मंत्री बृजमोहन अग्रवाल ह रायपुर के ऐतिहासिक महादेव घाट म नवनिर्मित लक्ष्मण झूला अउ सुग्‍घर बगइचा के आज अवलोकन करिन। श्री अग्रवाल के उदीम ले बनत ये लक्ष्मण झूला प्रदेश के पर्यटन के प्रमुख केंद्र होए के संगेच प्रदेश के विकास ल चार चांद लगइया होही।
अवलोकन के समय बृजमोहन अग्रवाल ह इहां पर्यटक मन के सुविधा बर जउन व्‍यवस्‍था रखे जाही तेकर जानकारी लीन। उंखर बइठे के व्यवस्था, गाड़ी मन के पार्किंग, कैंटीन आदि के उचित व्यवस्था मन बर अफसर मन ल निर्देश दीन। बृजमोहन अग्रवाल ह कहिन कि महादेव घाट म भगवान शिव मंदिर के तीर बनाए जात ये झूला छत्तीसगढ़ के भव्यता ल प्रदर्शित करत दिखही। ये धार्मिक पर्यटन के दृष्टि ले घलोक काफी अहम होही। इहां नदिया के सुग्‍घर पार म प्रकृति के गोद मे बइठके मनखे शांति अऊ सुख के आनंद के अनुभव कर सकहीं। उमन कहिन कि खारून नदी के महादेव घाट हमर धार्मिक आस्था के केंद्र हे। एकर संरक्षण करत एला सहेजना अऊ संवारना जरूरी रहिस। इही बात ल ध्यान म रखके एकर निर्माण के सोंच बनिस। एखर बने ले विशेष रूप ले रायपुर महानगर के भीड़ ले दूरिहा एक शांत अऊ सुंदर स्थान म मनखे सुकून ले भरे पल बिता सकहीं।



श्री अग्रवाल ह अधिकारी मन ल भाटागांव एनीकट ले कुम्हारी एनीकट तक खारून नदी के साफ-सफाई करे बर कार्य योजना बनाए के निर्देश दीन। उमन कहिन कि महादेव घाट के तीर-तखार के पूरा हिस्सा ल विकसित करे बर प्रस्ताव बनाए जाय। नदी तट म विकसित उद्यान म लक्ष्मण झूला ले होके घलोक पहुंचे जा सकत हे। जल संसाधन मंत्री ह मौका म उपस्थित दुर्ग कलेक्टर उमेश अग्रवाल ल दुर्ग जिला के तरफ ले उद्यान म आए-जाए बर दू नवा रद्दा बनाए बर कार्रवाई करे के निर्देश दीन। जल संसाधन मंत्री ह दुर्ग कलेक्टर ल लोकार्पण समारोह के तैयारी शुरू करे के निर्देश घलोक दीन। श्री अग्रवाल ह उद्यान म अवइया मनखे मन के सुविधा बर एक रेस्ट हाउस बनाए अउ उद्यान म लाईट के समुचित व्यवस्था करे बर घलोक अधिकारी मन ल निर्देशित करिन।
महादेवघाट म दुर्ग जिला के छोर म रिवर फ्रन्ट म करीब 900 मीटर लंबा उद्यान विकसित कर ले गए हे। घाट म लक्ष्मण झूला बन के तइयार हे। महादेवघाट के सौंदर्यीकरण अऊ लक्ष्मण झूला बनाए के काम जल संसाधन विभाग कोति करे गए हे। करीबन छै करोड़ 10 लाख रूपिया के लागत ले 150 मीटर लक्ष्मण झूला बनाए गए हे। ये मां ले 90 मीटर के हिस्सा सस्पेंशन होही। दुर्ग जिला के हिस्सा म रिवर फ्रंट म 900 मीटर म उद्यान बनके तइयार हे। उद्यान म पेडस्टेन ट्रेक, एक्वाप्रेशर ट्रेक अऊ गोल्फकार्ट ट्रेक बनाय गए हे। उद्यान म लइका मन के मनोरंजन बर कई प्रकार के झूला लगाए गए हे। एक कैफेटेरिया के निर्माण घलोक इहां पर्यटक मन के सुविधा बर करे गए हे। एक्सरसाइज अऊ योगाभ्यास बर अलग-अलग ट्रेक बने हे। ए अवसर म जिला सहकारी केन्द्रीय बैंक दुर्ग के अध्यक्ष प्रीतपाल बेलचंदन, रायपुर नगर निगम के पार्षद दीनबंधु ठाकुर, शयादराम साहू, संजू नारायण सिंह ठाकुर, बिहारी लाल साहू, श्री मुकेश पंजवानी, दुर्ग जिला के वरिष्ठ पुलिस अधीक्षक डॉ. संजीव शुक्ला, रायपुर नगर निगम के आयुक्त रजत बंसल, जल संसाधन विभाग के प्रमुख अभियंता  एच.आर. कुटारे संग रायपुर अऊ दुर्ग जिला के कई ठन विभाग मन के वरिष्ठ अधिकारी उपस्थित रहिन।


मुहाचाही:  आंधी-तूफान म अऊ मजबूत होइस राजिम कुंभ के आस्था