डॉ. रमन सिंह

साहू समाज ले मिलीस मुख्यमंत्री कन्या विवाह योजना शुरू करे के प्रेरणा : डॉ. रमन सिंह

मां कर्मा के आशीर्वाद ले साहू समाज हर क्षेत्र म अग्रणी : मुख्यमंत्री सामिल होइन मां कर्मा जयंती समरसता उत्सव म
मां कर्मा समरसता भवन निर्माण बर 20 लाख रूपिया के मंजूरी

रायपुर, 09 अपरेल 2018। मुख्यमंत्री डॉ. रमन सिंह ह कहिन हे कि मां कर्मा के प्रेरणा, आशिर्वाद अऊ ऊंखर बताए गए मार्ग म चलके साहू समाज ह आगू बढ़त हे। साहू समाज के सामूहिक विवाह कार्यक्रम ल देख के ही राज्य सरकार ल मुख्यमंत्री कन्या विवाह योजना शुरू करे के प्रेरणा मिलीस। ए योजना के तहत राज्य म हजारों बेटी मन के हाथ पिंवरा होए हे। अब गरीब परिवार के बेटी मन के बिहाव के चिंता राज्य सरकार करथे।
मुख्यमंत्री डॉ. सिंह आज जिला मुख्यालय बैकुण्ठपुर के प्रेमाबाग म जिला साहू संघ कोति ले आयोजित मां कर्मा के 1002वां जयंती के अवसर म आयोजित समरसता उत्सव ल संबोधित करत रहिन। उमन कहिन कि साहू समाज एक उन्नतिशील अऊ जागरूक समाज हे। छत्तीसगढ़ के विकास म आन समाज मन के संग साहू समाज के घलोक महत्वपूर्ण योगदान हे। ये समाज कुरीति मन के परित्याग करके आगू बढ़त हे अऊ अपन मेहनत ले आज हर क्षेत्र म अग्रणी हे।




मुख्यमंत्री डॉ. सिंह ह ए अवसर म मां कर्मा समरसता भवन निर्माण बर 20 लाख अऊ देवरहा सेवा समिति के ज्योति कक्ष निर्माण बर 15 लाख रूपिया के मंजूरी के घोषणा करिन। उमन मां कर्मा के फोटू के आघू दीप प्रज्जवलित करके जयंती समारोह के शुभारंभ करिन। मुख्यमंत्री डॉ. सिंह ह मां कर्मा के जयंती म मनखे मन ल अपन बधाई अऊ शुभकामनाएं दीन। उमन कहिन कि राज्य म प्रधानमंत्री उज्ज्वला योजना के तहत अब तक 19 लाख 45 हजार गरीब कुटुंब के महिला मन ल 200 रूपिया के पंजीयन शुल्क म रसोई गैस कनेक्‍सन देहे गए हे। अवइया चार महिना के भीतर 20 लाख अकतहा महिला मन ल घलोक मामूली दर म गैस कनेक्‍सन देहे जाही। उमन कहिन कि प्रधानमंत्री आवास योजना के तहत प्रदेश म अब तक 3 लाख 40 हजार मनखे मन बर पक्का घर बनाए गए हे। प्रदेश के आवासहीन सबो मनखे मन ल 2022 तक घर देवाए के हमर योजना हे। मुख्यमंत्री डॉ. सिंह ह कहिन कि पहिली गरीब मनखे मन तिर इलाज बर अउ दवई बिसाये बर पइसा नइ होत रहिस, जेखर कारण ओ मन ल अड़बड़ तकलीफ होत रहिस। एला देखत प्रदेस म मुख्यमंत्री स्वास्थ्य सुरक्षा योजना लागू करे गीस। ए योजना के तहत पहिली 30 हजार रूपिया तक के निःशुल्क इलाज के सुविधा देहे गए रहिस, जऊन ल बढ़ाके अब 50 हजार रूपिया कर दे गए हे। उमन मुख्यमंत्री खाद्यान्न सुरक्षा योजना के घलोक उल्लेख करिन।




मुख्यमंत्री डॉ. सिंह ह कहिन कि देश के प्रधानमंत्री श्री नरेंद्र मोदी 14 अपरेल के दिन बीजापुर के जांगला गांव आवइया हें उमन इहां देश के सबले बड़े योजना भारत आयुश्मान योजना के शुभारंभ करहीं। ए योजना के तहत गरीबी लकीर श्रेणी के परिवार मन ल पांच लाख रूपिया तक के निःशुल्क इलाज के सुविधा देहे जाही। उमन कहिन कि किसान मन के समृध्दि अऊ खुसहाली बर शून्य प्रतिषत ब्याज म कृषि ऋण, खाद अउ बीज, धान के बोनस देहे जात हे। मुख्यमंत्री ह कहिन कि प्रदेश म पाछू 14 बछर म सड़क मन के जाल बिछे हे। व्यापक स्तर म पुल-पुलिया मन के निर्माण करे गए हे। ए सेती अब आवागमन सुगम होय हे।
श्रम, खेल अउ युवा कल्याण मंत्री श्री भईयालाल राजवाडे ह कार्यक्रम ल संबोधित करत कहिन कि साहू समाज के गौरवशाली इतिहास रहे हे। साहू समाज अपन पूर्वज मन के आशीर्वाद ले सरलग आघू बढत हे। उमन कहिन कि जऊन समाज शिक्षा के क्षेत्र म आगू बढही, वो अग्रणी समाज के रूप म जाने जाही। साहू समाज के कार्यकारी राष्‍ट्रीय अध्यक्ष श्री मोतीलाल साहू ह कहिन कि मां कर्मा ह अंधविश्‍वास ल झटक के दीन दुखिया मन के सेवा करिन अऊ समाज ल स्वाभिमान के संग जीए के रस्‍ता बताइन।
कार्यक्रम ल कोरिया जिला के साहू समाज के अध्यक्ष श्री संदीप साहू ह घलोक संबोधित करिन। साहू समाज के जिला उपाध्यक्ष श्री कुबेर साहू ह स्वागत भाषण दीन।
ए अवसर म संसदीय सचिव अउ भरतपुर-सोनहत क्षेत्र के विधायक श्रीमती चंपादेवी पावले, मनेन्द्रगढ विधानसभा क्षेत्र के विधायक श्री श्‍याम बिहारी जायसवाल, छत्तीसगढ़ ब्रेवरेजेस कॉर्पोरेशन के पहिली अध्यक्ष श्री सचिदानंद उपासने, रायपुर नगर निगम के पहिली महापौर श्री सुनील सोनी, नगर पालिका बैकुण्ठपुर के उपाध्यक्ष श्री सुभाष साहू, सरगुजा राजस्व संभाग के आयुक्त श्री अविनाश चंपावत, सरगुजा संभाग के आई.जी. श्रीमती नेहा चंपावत, कलेक्टर श्री नरेंद्र कुमार दुग्गा, पुलिस अधीक्षक श्री विवेक शुक्ला संग कई ठन क्षेत्र ले आए साहू समाज के अलावा कई ठन समाज के नागरिक, जनप्रतिनिधि बड़ संख्या म उपस्थित रहिन।



मुहाचाही:  प्रधानमंत्री आवास देखे मुख्यमंत्री पहुंचिन हितग्राही मन के घर