Helth अजय चन्द्राकर रायपुर

सामाजिक बदलाव लाय म डिजिटल प्लेटफार्म प्रभावी माध्मय : श्री अजय चंद्राकर

स्वास्थ्य मंत्री ह ‘डिजिटल प्लेटफार्म के माध्यम ले संवाद‘ के शुभारंभ करिस

रायपुर, 11 जुलाई 2018। स्वास्थ्य अउ कुटुंब कल्याण मंत्री श्री अजय चंद्राकर ह आज इहां राजधानी स्थित एक निजी होटल म डिजिटल प्लेटफार्म के माध्यम ले गोठ के शुभारंभ करिस। ये कार्यक्रम ’राष्ट्रीय स्वास्थ्य मिशन अऊ यू.एस.एड. अउ डिजिटल ग्रीन के सहयोग ले आयोजित करे गीस। श्री चंद्राकर ह ए मौका म स्वास्थ्य के क्षेत्र म उत्कृष्ट काम करइया राजनांदगांव जिला के मितानिन श्रीमती सोहनी बंजारे, पोमिन देवांगन, पार्वती मांडवी, शांति पटौती अऊ हेमलता साहू ल सम्मानित करिस।
स्वास्थ्य मंत्री श्री चंद्राकर ह ए अवसर म कहिन कि सामाजिक अऊ व्यावहारिक परितर्वन लाय म डिजिटल प्लेटफार्म प्रभावी अउ परिणाम मूलक माध्यम हे। श्री चंद्राकर ह कहिन कि राष्ट्रीय स्वास्थ्य मिशन अउ डिजिटल ग्रीन ह पीको वीडियो के माध्यम ले शासन के योजना जइसे कुटुंब नियोजन, मातृत्व अउ शिशु सुरक्षा अउ पोषण के प्रति गांव वाले मन ल जागरूक करे के काम सराहनीय कदम हे। उमन कहिन कि प्रदेश म स्वास्थ्य, शिक्षा अऊ गरीबी उन्मूलन के क्षेत्र म बेहतर काम होए हे। ये क्षेत्र मन म प्राप्त सूचकांक ले स्पष्ट होथे। उमन बताइस कि विभाग कोति ले संचालित योजना मन अऊ मैदानी अमला मन के मेहनत अऊ मनखे मन म स्वास्थ्य के प्रति जागरूकता के परिणाम हे कि आज मनखे संस्था मन तक पहुंचत हें। मनखे मन म स्वास्थ्य संस्था मन के प्रति विश्वास बाढ़े हे। स्वास्थ्य सेवा माननीय संवेदना ले जुड़े सेवा ये। जेखर सेती ईमानदारी अऊ सेवा भावना ले मरीज मन के सेवा करना चाही।




स्वास्थ्य विभाग के सचिव श्रीमती निहारिका सिंह बारिक ह घलोक कार्यक्रम ल सम्बोधित करिस। श्रीमती बारिक ह कहिन कि आडियो-वीडियो विजवल मनखे मन तक संदेश पहुंचाए बर बहुत ही प्रभावी माध्यम हे। स्वास्थ्य सेवा अंधविश्वास ले घलोक घिरे रहिथे। डिजिटल माध्यम ले जागरूकता संदेश पहुंचे ले मनखे मन म स्वास्थ्य के प्रति अऊ जादा जागरूकता बाढ़ही। उमन बताइस कि पिको प्रोजेक्टर के माध्यम ले गांव वाले मन कोति ले ही निर्मित वीडियो फिल्म गांव वाले मन ल ही देखाय जाही। ए वीडियो फिल्म म स्थानीय मनखे ही अभिनय करहीं, जेखर से इहां के भाखा अऊ संदेश प्रभावी रूप ले गांव वाले मन तक पहुंचही, जेखर से स्वास्थ्य के प्रति ऊंखर व्यवहार म बदलाव लाए म सहायता होही। श्रीमती बारिक ह बताइस कि पहिली ये पायलेट प्रोजेक्ट के रूप म राजनांदगांव जिला म संचालित होवत रहिस। अब ए कार्यक्रम ल कवर्धा, धमतरी, बेमतरा अऊ बलौदाबाजार जिला म पिको प्रोजेक्टर के माध्यम ले गांव वाले मन ल स्वास्थ्य के संबंध म जागरूक करबोन।
ए अवसर म संचालक स्वास्थ्य सेवाएं श्रीमती रानू साहू, राष्ट्रीय स्वास्थ्य मिशन के प्रबंध संचालक डॉ. सर्वेश्वर नरेन्द्र भूरे, संचालक चिकित्सा शिक्षा डॉ. ए.के. चंद्राकर, स्वास्थ्य अउ परिवार कल्याण अउ महामारी के संचालक डॉ. आर.आर. शाहनी, यू.एस.एड के रिजनल डायरेक्टर डॉ. अमित शाह, डिजिटल ग्रीन के कंट्री हेड श्री विनय कुमार संग स्वयंसेवी संस्था मन के प्रतिनिधि अऊ विभागीय अधिकारी-कर्मचारी अउ मितानिन उपस्थित रहिन।



मुहाचाही:  रायपुर जिला बर 40 हेल्थ अउ वेलनेस सेंटर के शुभारंभ