डॉ. रमन सिंह

मुख्यमंत्री ह सुकमा नक्सल हमला के कठोर शब्द म करिन निंदा

जवान मन के शहादत म गहरा दुःख व्यक्त करिन

रायपुर, 13 मार्च 2018। छत्तीसगढ़ के मुख्यमंत्री डॉ. रमन सिंह ह आज राज्य के सुकमा जिला म नक्सली मन कोति ले केन्द्रीय रिजर्व पुलिस बल के जवान मन उपर घात लगाके हमला करे के घटना के कठोर शब्द म निंदा करिन। डॉ. सिंह ह ए हमला ल नक्सली मन के कायरतापूर्ण हरकत बताइन अऊ ये मां सीआरपीएफ के जवान मन के शहादत उपर गहरा दुःख व्यक्त करिन। डॉ. सिंह ह कहिन कि सुकमा जइसे आदिवासी बहुल जिला मन म राज्य सरकार कोति ले जनता के सुविधा बर सड़क, बिजली, पानी, शिक्षा, स्वास्थ्य सेवा आदि के क्षेत्र म हर प्रकार के निर्माण अऊ विकास के काम करे जात हे, जेखर से ए जिला मन के तस्वीर बदलत हे अऊ नक्सली मन के अस्तित्व संकट म हे। एखर से डेराके ऊंखर कोति ले विकास कार्य मन म रूकावट डारे बर ए प्रकार के कायरतापूर्ण अऊ शर्मनाक हमला करे हें। ये नक्सली मन के जन-विरोधी अऊ विकास-विरोधी हिंसक मानसिकता के परिचायक हे। मुख्यमंत्री ह कहिन कि आज सुरक्षा बल मन के हमार जऊन बहादुर जवान मन ह कर्त्तव्य के मार्ग म अपन आहूति देहे हें, उंखर ए शहादत ल हमेशा याद रखे जाही। डॉ. सिंह ह कहिन- हम सब छत्तीसगढ़वासी ए शहीद मन के शोक संतप्त परिवार के प्रति संवेदना प्रकट करत हन। मुख्यमंत्री ह हमला म घायल जवान मन के जल्दी स्वास्थ्य लाभ के कामना करे हें। उमन अधिकारी मन ल घायल जवान मन के बेहतर ले बेहतर इलाज करवाए के निर्देश दीए हें।



मुहाचाही:  विकास यात्रा पहुंचिस नारायणपुर : स्वागत बर उमड़ीस जन सैलाब