अभिषेक सिंह डॉ. रमन सिंह

मुख्यमंत्री डॉ. सिंह ह सुकुलइदहान म बुनकर मन के काम के करिन प्रशंसा

मुख्यमंत्री सुकुलदइहान अऊ लिटिया गाँव म गांव वाले मन ले करिन मुलाकात

रायपुर, 21 अप्रैल 2018। मुख्यमंत्री डॉ. रमन सिंह आज राजनांदगांव जिला के प्रवास के बेरा सुकुलदइहान, बम्हनी अऊ लिटिया गांव म भ्रमण करके गांव वाले मन ले मुलाकात करिन। मुख्यमंत्री ह ग्राम सुकुलदइहान म महिला बुनकर मन ले मुलाकात करिन अऊ ऊंखर काम के प्रशंसा करिन। उमन सुकुलदइहान म बुनकर प्रशिक्षण भवन बनाए बर 20 लाख रूपिया देहे के घोषणा करिन। संगेच 75 लूम खरीदे बर 13 लाख रूपिया के घलोक स्वीकृति प्रदान करिन। मुख्यमंत्री ह बम्हनी गांव म शासकीय उचित मूल्य दुकान बर भवन निर्माण, यादव समाज के भवन बर 10 लाख रूपिया अउ महिला प्रशिक्षण भवन बर 10 लाख रूपिया के घोषणा करिन। उमन लिटिया गांव म महिला ग्राम संगठन बर भवन अऊ पंचायत भवन म अकतहा विस्तार बर 5 लाख रूपिया के स्वीकृत प्रदान करिन।



डॉ. सिंह ह सुकुलदइहान म आयोजित सभा म कहिन कि मनखे प्रशिक्षण भवन म घलोक बइठके काम कर सकत हें। उमन कहिन कि सुकुलदइहान के महिला मन लूम के माध्यम ले अकतहा आय अर्जित करत हें। आजीविकामूलक गतिविधि मन के जतका विस्तार होही, ओतकेच मनखे मन के आर्थिक स्तर ऊँचा उठही। मुख्यमंत्री ह ए अवसर म कहिन कि चारों कोति ले सुकुलदइहान बर अच्छा सड़क बने हे। प्रदेश म घलोक अइसनहे बेहतर सड़क कनेक्टिविटी, बिजली के सुविधा अउ आन सुविधा बाढ़े हे। मुख्यमंत्री ह ग्राम लिटिया म कहिन कि प्रधानमंत्री आवास योजना, उज्ज्वला योजना के माध्यम ले एक बड़का बदलाव मनखे मन के जीवन म आवत हे। स्वास्थ्य के क्षेत्र म एक बड़का कदम उठात प्रधानमंत्री श्री नरेंद्र मोदी ह आयुष्मान भारत योजना सुरू करिन। ये मां गरीब परिवार मन के पाँच लाख रूपिया तक के इलाज होही। ए मौका म सांसद श्री अभिषेक सिंह ह अपन संबोधन म कहिन कि अब हर गाँव म प्रधानमंत्री आवास के मकान बने हे। आबादी के अनुपात के मुताबिक कहूं 60 मकान, कहूं 80 मकान अऊ कहूं-कहूं 100 मकान घलोक बने हे। मनखे मन के घर मन म उज्ज्वला योजना के सिलेंडर आए हे। पानी, बिजली अऊ सड़क जइसे अधोसंरचना के विषय म घलोक बड़का बदलाव आए हे। श्री सिंह ह कहिन कि जऊन मनखे पेंशन ले वंचित रहिन, ओ मन ल ए योजना के लाभ देवाए बर मुख्यमंत्री पेंशन योजना लाए गए हे। एखर से बड़ संख्या म पेंशन ले वंचित हितग्राही मन ल पेंशन के सुविधा मिल सकही। मुख्यमंत्री डॉ. रमन सिंह ह ए अवसर म ग्राम लिटिया के सरपंच ल गांव ल पूर्ण विद्युतीकृत कराए बर करे गए काम बर प्रशस्ति पत्र प्रदान करिन।

मुहाचाही:  मुख्यमंत्री ले नव नियुक्त जनसम्पर्क संचालक ह करिस सौजन्य मुलाकात