डॉ. रमन सिंह

प्रधानमंत्री ह उत्तर बस्तर ल दीस रेल सेवा के ऐतिहासिक सौगात

वीडियो कॉन्फ्रेसिंग के संग दल्लीराजहरा-भानुप्रतापपुर नवा रेल लाईन के लोकार्पण अऊ पछिंजर सेवा के करे गीस शुभारंभ
जनता ह प्रधानमंत्री अऊ मुख्यमंत्री के प्रति व्यक्त करिस आभार

रायपुर, 14 अप्रैल 2018। प्रधानमंत्री श्री नरेन्द्र मोदी के हाथ आज छत्तीसगढ़ के आदिवासी बहुल उत्तर बस्तर (कांकेर) जिला ल रेल लाइन अऊ यात्री रेल के ऐतिहासिक सौगात मिलीस। श्री मोदी ह संविधान बनइया बाबा साहब डॉ. भीमराव अम्बेडकर के जन्म जयंती के अवसर म बस्तर संभाग के ग्राम जांगला (जिला-बीजापुर) म आयोजित कार्यक्रम म वीडियो कॉन्फ्रेसिंग के संग राज्य के बालोद जिला के दल्लीराजहरा ले भानुप्रतापपुर (जिला उत्तर बस्तर) तक रेल सेवा के शुभारंभ करिन। ये रेल सेवा दल्ली राजहरा ले रावघाट अऊ जगदलपुर तक बनइया करीबन 235 किलोमीटर रेल परियोजना के एक हिस्सा ये। एखर अंतर्गत प्रधानमंत्री ह भानुप्रतापपुर ले जिला बालोद के गुदुम स्टेशन तक नवनिर्मित रेल्वे लाईन के लोकार्पण अऊ हरी झंडी देखाके भानुप्रतापपुर ले गुदुम तक विस्तारित पैसेन्जर रेल सेवा के शुरूआत करत जनता ल बधाई दीन। एखरे संग उत्तर बस्तर (कांकेर) अब दुर्ग ले होत राजधानी रायपुर तक रेल सेवा ले सीधा जुड़ गे।
प्रधानमंत्री ह जांगला के विशाल जनसभा म आन विषय मन के संगेच ए नवा रेल सेवा के विशेष रूप ले उल्लेख करिन अऊ प्रसन्नता व्यक्त करत कहिन कि ए रेल सेवा के संचालन के पूरा जिम्मेदारी महिला मन ह संभालत हें। हमर बेटी मन छत्तीसगढ़ के जंगल ले ट्रेन चलावत हें। स्टेशन प्रबंधक, लोको पायलट, गार्ड अऊ टीटी जइसे सबो पद मन म महिला मन काम करत हें।
प्रधानमंत्री के हरी झंडी दिखातेच भानुप्रतापपुर रेल्वे स्टेशन म उपस्थित क्षेत्र के हजारों मनखे मन ह ताली बजाके अऊ हाथ हलाके खुशी के इजहार करिन। जनता मन ये ऐतिहासिक काम बर प्रधानमंत्री श्री नरेन्द्र मोदी अऊ मुख्यमंत्री डॉ. रमन सिंह के प्रति आभार व्यक्त करिन। ए अवसर म प्रदेश के नगरीय प्रशासन अउर विकास, वाणिज्यिक कर, वाणिज्य अउर उद्योग मंत्री श्री अमर अग्रवाल, सांसद श्री विक्रम उसेण्डी, बस्तर विकास प्राधिकरण के उपाध्यक्ष अउर अंतागढ़ विधायक श्री भोजराज नाग, भानुप्रतापपुर विधायक श्री मनोज मण्डावी, छत्तीसगढ़ राज्य मछुआ कल्याण बोर्ड के अध्यक्ष श्री भरत मटियारा, छत्तीसगढ़ शासन के सचिव श्री सोनमणि वोरा, कलेक्टर श्री टामन सिंह सोनवानी, बिलासपुर जोन दक्षिण पूर्व मध्य रेल्वे के महाप्रबंधक श्री सुनील सिंह सोइन संग बहुत अकन वरिष्ठ अधिकारी, जनप्रतिनिधि अऊ बड़ संख्या म आमजन मौजूद रहिन।
कार्यक्रम म उपस्थित स्कूली बालिका मन म कु. लाली सिन्हा, अम्बिका, रश्मि संग क्षेत्र के श्री गजानंद, ईश्वर, रोहित, जीवराखन आदि ह हर्ष व्यक्त करत कहिन कि आजादी के बाद आज सुनहरा अवसर आए हे। भानुप्रतापपुर ले रेल सेवा शुरू होए म कांकेर अऊ नारायणपुर जिला के आम मनखे मन के संग व्यापारी, छात्र, युवा अऊ सबो वर्ग के मनखे मन ल एकर लाभ मिलही। व्यवसायी श्री अनिल जैन अऊ राजकुमार गुप्ता ह कहिन कि आदिवासी अंचल के मनखे अब रेल सेवा ले दुर्ग अऊ राजधानी रायपुर ले सीधा जुड़ गें। रेल परिचालन ले क्षेत्र के तरक्की होही अऊ विकास के अवसर प्राप्त होही। युवक देवेन्द्र कुमार अऊ तनवीर खान ह हर्ष व्यक्त करत कहिन कि आज ओ मन ल अड़बड़ खुसी होवत हे। क्षेत्र के मनखे मन के कई बछर के सपना आज पूरा होए हे। रेल परिचालन ले दुर्ग अउ रायपुर कम समय म पहुंचबोन अऊ किराया घलोक कम लगही।

मुहाचाही:  स्कूली लइका मन ह देखिन विधान सभा