खेल डॉ. रमन सिंह रायपुर

कामनवेल्थ खेल के चीफ डी मिशन के रूप म श्री विक्रम सिसोदिया ह करिस छत्तीसगढ़ ल गौरवान्वित: डॉ. रमन सिंह

रायपुर 27 अप्रैल 2018। मुख्यमंत्री डॉ. रमन सिंह ह आज इहां मंत्रालय म आयोजित एक सादा समारोह म कामनवेल्थ खेल मन म भारत के प्रतिनिधित्व करइया चीफ डी मिशन श्री विक्रम सिंह सिसोदिया ल शॉल अऊ श्रीफल भेंटकरके सम्मानित करिन। आप मन जानतेच होहू के श्री सिसोदिया मुख्यमंत्री के विशेष कर्त्तव्यस्थ अधिकारी हें। ये सम्मान समारोह मुख्यमंत्री सचिवालय अऊ खेल विभाग कोति ले आयोजित करे गीस।
डॉ. सिंह ह ए अवसर म कहिन कि श्री सिसोदिया ल चीफ डी मिशन के रूप म कामनवेल्थ खेल मन म देश के प्रतिनिधित्व करे के अवसर मिलीस। ये छत्तीसगढ़ बर अऊ व्यक्तिगत रूप ले श्री सिसोदिया बर गौरव के बात हे। कामनवेल्थ खेल मन म भारत के खिलाड़ि मन ह अपन शानदार प्रदर्शन करत देश ल तीसर स्थान देवाइन, ए गौरवशाली उपलब्धि म चीफ डी मिशन के रूप म श्री सिसोदिया के कुशल नेतृत्व के घलोक महत्वपूर्ण भूमिका हे। अन्तर्राष्ट्रीय खेल मन म श्री सिसोदिया कोति ले अर्जित करे बहुमूल्य अनुभव के लाभ छत्तीसगढ़ के खेल जगत ल घलोक मिलही। डॉ. सिंह ह कहिन कि मुख्यमंत्री सचिवालय ले आज कुटुंब भाव के संग श्री सिसोदिया के सम्मान करे जात हे। मुख्यमंत्री ह श्री सिसोदिया के उज्ज्वल भविष्य बर शुभकामना दीन। खेल मंत्री श्री भईया लाल राजवाड़े, मुख्य सचिव श्री अजय सिंह, मुख्यमंत्री के प्रमुख सचिव श्री अमन कुमार सिंह, मुख्यमंत्री के सचिव द्वय श्री सुबोध कुमार सिंह अऊ श्री एम.के. त्यागी, मुख्यमंत्री के विशेष सचिव श्री मुकेश बंसल, खेल विभाग के सचिव श्री आर. प्रसन्ना अऊ जनसम्पर्क विभाग के विशेष सचिव श्री राजेश सुकुमार टोप्पो संग खेल विभाग के वरिष्ठ अधिकारी ए अवसर म उपस्थित रहिन।



मुख्यमंत्री के प्रमुख सचिव श्री अमन कुमार सिंह ह कहिन कि विदेश म भारत के प्रतिनिधित्व करई अपेक्षाकृत चुनौतीपूर्ण रहिथे। छोट-छोट बात मन बर संघर्ष करना परथे। श्री विक्रम सिसोदिया ह बड़ कुशलतापूर्वक अपन मिशन प्रमुख के जिम्मेदारी के निर्वाह करे हें, जेकर सेती खिलाड़ी मन निश्चिंत होके अपन खेल म ध्यान दे सकिन। श्री सिसोदिया के नेतृत्व म कामनवेल्थ खेल मन म भारत के प्रदर्शन उल्लेखनीय रहे हे। ये रायपुर शहर, छत्तीसगढ़ अऊ मुख्यमंत्री सचिवालय बर गौरव के विसय हे। खेल सचिव श्री आर. प्रसन्ना ह कहिन कि आस्ट्रेलिया के गोल्डकोस्ट म आयोजित कामनवेल्थ खेल मन म श्री विक्रम सिसोदिया के नेतृत्व म आस्ट्रेलिया अऊ इंग्लैंड के बाद भारत के तीसर स्थान म रहिस। भारत ह कुल 66 पदक जीतिस। एमां ले 26 स्वर्ण पदक, 20 रजत पदक अऊ 20 कांस्य पदक हे। उमन टीम भावना के संग खिलाड़ि मन के बेहतर प्रबंधन के संग नेतृत्व करिन। श्री सिसोदिया ह छत्तीसगढ़ टेनिस एसोसिएशन के अध्यक्ष के रूप म प्रदेश म टेनिस खेल ल लोकप्रिय बनाए म महत्वपूर्ण योगदान देहे हें। बहुत अकन जिला मुख्यालय मन म टेनिस कोर्ट बनाय गए हे अऊ ए खेल ल प्रोत्साहन देहे जात हे। श्री प्रसन्ना ह कहिन कि गोवा के बाद छत्तीसगढ़ म राष्ट्रीय खेल मन के आयोजन होवत हे। ए आयोजन म श्री सिसोदिया कोति ले कामनवेल्थ खेल मन म अर्जित करे अनुभव के लाभ मिलही।




श्री विक्रम सिंह सिसोदिया ह अपन उद्गार प्रकट करत मुख्यमंत्री के प्रति आभार प्रकट करिन। उमन कहिन कि मुख्यमंत्री डॉ. रमन सिंह के मार्गदर्शन अऊ प्रोत्साहन ले छत्तीसगढ़ म खेल के अच्छा वातावरण बने हे अऊ ओ मन ल खुद चीफ डी मिशन के रूप म देश के नेतृत्व करे के अवसर मिले हे। कामनवेल्थ गेम म भारत ह तीसर स्थान प्राप्त करके गौरवशाली उपलब्धि दर्ज करे हे। श्री सिसोदिया ह कहिन कि भारतीय ओलम्पिक संघ के संयुक्त सचिव के रूप म उंखर उदीम सबो खेल फेडरेशन मन के बीच बेहतर समन्वय स्थापित करे के होही, जेखर से खिलाड़ी अपन सर्वश्रेष्ठ प्रदर्शन कर सकंय। उमन कहिन कि कामनवेल्थ खेल मन के शुभारंभ अऊ स्वागत समारोह म जब भारत के तिरंगा शान से लहराइस, त ऊंखर संग सबो खिलाड़ी खुद ल गौरवान्वित महसूस करत रहिन। जीवन के ये पल ओ मन ल हर हमेसा सुरता रइही।


मुहाचाही:  छत्तीसगढ़ राज्य महिला आयोग कोति ले एक दिवसीय कार्यशाला संपन्न